ADNSU-ya yeni təyin olunan rektor kimdir?

Prezident İlham Əliyevin Sərəncamı ilə Rüfət Əzizov Sumqayıt Dövlət Universitetinin rektoru vəzifəsindən azad edilib və Azərbaycan Dövlət Neft və Sənaye Universitetinin rektoru təyin edilib.

Modern.az Rüfət Əzizovun tərcümeyi-halını təqdim edir.

Rüfət Eyvaz oğlu Əzizov 7 aprel 1980-ci ildə Bakı şəhərində anadan olub. 1998-ci ildə Beynəlxalq Mendeleyev Kimya Olimpiadası qalibi kimi Lomonosov adına Moskva Dövlət Universitetinin Kimya fakültəsinə imtahansız olaraq-müsabiqədən kənar qəbul olub və 2003-cü ildə kimya ixtisası üzrə məzun olduqdan sonra həmin ali məktəbdə elmi-işçi vəzifəsində çalışaraq, biokorroziya üzrə araşdırma və inkişaf proqramlarında iştirak etməklə universitetdə aspirantura təhsilini davam etdirib, 2006-cı ildə dissertasiya işini müdafiə edərək kimya elmləri üzrə fəlsəfə doktoru (PhD) elmi dərəcəsini alıb.

2008-ci ildə London Materiallar İnstitutunun peşəkar üzvlüyünə qəbul olub və Böyük Britaniya elmi cəmiyyəti tərəfindən “Chartered Scientist” elmi adına layiq görülüb. 2014-2016-cı illərdə ADA və Maastricht Universitetlərinin birgə MBA proqramını və 2018-2020-ci illərdə isə Oksford Universitetinin (Said Business School) ali biznes idarəçiliyi, “Executive MBA” proqramını bitirib.

2005-2012-ci illərdə BP şirkətində mühəndis kimi fəaliyyət göstərib. Azərbaycan Respublikası təhsil nazirinin 2021-ci il 7 yanvar tarixli əmri ilə Azərbaycan Respublikası Təhsil İnstitutunun direktoru vəzifəsinə təyin edilib.

O, İlham Əliyevin 13 sentyabr 2023-cü il tarixli Sərəncamı ilə Rüfət Eyvaz oğlu Əzizov Sumqayıt Dövlət Universitetinin rektoru təyin edilib.

Ailəlidir, iki övladı var.

©modern.az