“İkirəqəmli artım qeyri-neft qaz sektorunda uzun zamandır ki, yox idi”

“Bu çox yaxşı göstəricidir. Neft sektorunun 2,6% azalması fonunda qeyri-neft qaz sektoru 12, 3% artıb. İkirəqəmli artım qeyri-neft qaz sektorunda uzun zamandır ki, yox idi”.

Bunu Valyuta.az-a açıqlamasında iqtisadçı ekspert Xalid Kərimli Azərbaycan iqtisadiyyatının 5% artması ilə bağlı məlumata aydınlıq gətirərkən deyib. Ekspert ötən ilin yanvar ayında iqtisadiyyat bu ilki artımla müqayisədə 1, 5%  azaldığını xatırladıb:

“Neft qaz sektorunda  isə azalma 4,6%, qeyri-neft qaz sektorunda isə  artım 1,7% idi. Ümumilikdə isə iqtisadiyyat 1,5% azalmışdı. Bu il isə tamam əks senaridir”. 

Xalid Kərimli 2024-cü ildə 2,4% artım proqnozlaşdırdığını vurğulayıb:

“Onun üzərindən ilkin nəticəsinin gəlməsi müsbət haldır. Burada həm də böyük ehtimalla “COP-29” tədbirinin intensiv hazırlığının bəhrələri də var. Hökumət sürətli şəkildə bu tədbirə hazırlaşır. Bunun da statistikaya təsirləri var. Burada əsas məsələ artımın dayanıqlı olmasıdır. Əgər qeyri- neft ixracında da bu statistika 12-13 % arasında saxlanılacaqs bu çox yaxşıdır”.

Qeyd edək ki, Dövlət Statistika Komitəsinin məlumatına görə Azərbaycan iqtisadiyyatı 5% artıb. 2024-cü ilin yanvar ayında ölkədə 9 131 milyon manatlıq və ya əvvəlki ilin eyni dövrü ilə müqayisədə 5% çox ümumi daxili məhsul istehsal olunub. İqtisadiyyatın neft-qaz sektorunda əlavə dəyər 2,6 faiz azalıb, qeyri neft-qaz sektorunda isə 12,3% artıb.

Aylin