"Yaşayış xərcləri maaşı üstələmir" - İqtisadçı

Son vaxtlar vətəndaşlar arasında belə bir fikir tez-tez səslənir ki, əldə olunan maaş gündəlik yaşayış xərclərini tam qarşılamaq üçün kifayət etmir. İnsanlar bildirirlər ki, ərzaq, kommunal ödənişlər, nəqliyyat və digər əsas ehtiyaclara çəkilən xərclər maaş artımını qabaqlayır və ailə büdcəsində ciddi gərginlik yaradır.

Bu fonda sual aktuallaşır: həqiqətən bu gün yaşayış xərcləri əməkhaqqını üstələyir?

İqtisadçı Xalid Kərimli Valyuta.az-a açıqlamasında bildirib ki, 2026-cı il üçün yaşayış minimumu bir nəfər üçün 300 manat müəyyən edilib. Onun sözlərinə görə, orta aylıq əməkhaqqı 1100 manatdan çoxdur. Statistika göstərir ki, əslində yaşayış xərcləri əməkhaqqını üstələmir:

“Minimum əməkhaqqı hazırda 400 manatdır. Bu məbləğ fərdi şəxs üçün yaşayış minimumundan yüksək müəyyənləşdirilib. Minimum 300 manat tələb olunur ki, bir nəfər normal, minimal şərtlərlə yaşaya bilsin. Lakin yaşayış minimumu anlayışına yaxşı restoranlarda yemək, əyləncə tədbirlərinə qatılmaq daxil deyil”, – deyə iqtisadçı vurğulayıb.

Onun sözlərinə görə, yaşayış minimumunun hesablanması Nazirlər Kabinetinin minimum istehlak səbətinin tərkibi ilə bağlı qərarına əsasən aparılır. Bu səbətdə ərzaq, qeyri-ərzaq məhsulları və xidmətlər üzrə kateqoriyalar yer alır. Hər bir insanın il ərzində bu məhsul və xidmətlərdən nə qədər istehlak etməli olduğu müəyyən edilir, həmin normativlər mövcud qiymətlərə vurularaq yaşayış minimumu hesablanır.

“Yaxşı yaşamaq istəyən daha çox qazanmalıdır. Gəlirləri artırmaq lazımdır ki, vətəndaş daha yaxşı yaşaya bilsin”, – deyə Xalid Kərimli əlavə edib.

Tənzilə Ağabalayeva