Varlanmaq şansınızı artırmağın 5 yolu

İstədiyiniz zaman işləyib-işləməməyə özünüzün qərar verdiyi, istirahət etmək və ya sevdiyiniz işlə məşğul olmaq azadlığına sahib olduğunuz bir həyat təsəvvür edin.

Növbəti ödənişləri necə edəcəyiniz barədə narahat olmadığınız, maddi təminatınızın yüksək olduğu bir həyat düşünün. Həmçinin uğur qazandığınızı hiss etdirən rahatlıq və imkanlara sahib olduğunuzu xəyal edin.

Bir çox insan belə bir həyat arzulayır. Lakin hər kəs bu məqsədə çata bilmir.

Aşağıdakı beş tövsiyə isə varlanmaq və maliyyə müstəqilliyinə yaxınlaşmaq şansınızı artırmağa kömək edə bilər:

1. Qazandığınız bütün pulu xərcləməyin

Varlanmağın ən vacib qaydası qazandığınızdan az xərcləməkdir. Bir çox insan əldə etdiyi bütün gəliri xərcləyir, hətta bundan da artıq vəsait sərf edərək kredit kartı borcları yığır. Belə borclar isə yüksək faiz səbəbindən ödənilməsi çətin maliyyə yükünə çevrilə bilər.

Əgər varlanmaq istəyirsinizsə, qazandığınız bütün məbləği xərcləməyin. Bir çox işəgötürən əməkhaqqının müəyyən hissəsinin birbaşa əmanət hesabına köçürülməsini təmin edir. Pul maaşı almamışdan əvvəl hesabınıza yönəldildikdə onun gündəlik xərclərə sərf olunmadığını belə hiss etməyə bilərsiniz.

Özünüzə daha az vəsait ayırmaqla daha qənaətli yaşamağa alışa bilərsiniz. Telefon xərcləri, televiziya xidmətləri, geyim, məişət alış-verişi, restoran və əyləncə kimi sahələrdə xərcləri azaltmaq mümkündür. İxtiyari xərclər azaldıqca qənaət etmək daha asan olur.

2. Yığım edin

Qazandığınız bütün pulu xərcləmədikdə qənaət etmək imkanı yaranır. Məqsəd uzunmüddətli investisiyalar üçün maaşınızın təxminən 5 faizini yığmaq ola bilər. Bu vəsait zamanla artaraq maliyyə müstəqilliyinə çatmağınıza kömək edə bilər.

Bundan əlavə, avtomobil almaq və ya mənzil üçün ilkin ödəniş etmək kimi iri alışlar məqsədilə ayrıca yığım hesabı yaratmaq da məqsədəuyğundur.

Mümkün olduqda mebel və ya avtomobil kimi bahalı alışlar üçün əvvəlcədən pul toplamağa çalışın və kreditdən və ya kredit kartından istifadə etməyin. Həyatın ilk mərhələlərində bu, həmişə mümkün olmaya bilər və ilk avtomobil üçün kredit götürmək lazım gələ bilər. Lakin sonrakı böyük alışlarda əvvəlcə vəsaiti toplamaq daha sağlam maliyyə qərarı hesab olunur.

3. Dəbdəbəli seçimlərinizi düşünülmüş şəkildə edin

Hər kəs üçün dəbdəbə anlayışı eyni deyil. Bəziləri üçün bahalı avtomobilə sahib olmaq ən böyük zövqdür. Digərləri üçün isə çox səyahət etmək və ya ən son moda geyimlərini almaq daha önəmlidir.

Özünüz üçün həqiqətən dəyərli olan bir və ya iki üstünlüyü seçin və digər, sizin üçün o qədər də vacib olmayan xərcləri azaldın. Məsələn, avtomobili hər il deyil, beş və ya on ildən bir yeniləyə bilərsiniz. Axşam yeməyini restoranda yemək əvəzinə nahar vaxtı bu imkandan istifadə edə və ya uzun müddət istifadə oluna bilən klassik geyimlər seçə bilərsiniz.

Sizin üçün həqiqətən əhəmiyyət kəsb edən rahatlıqlara üstünlük verməklə həm məmnun, həm də maliyyə baxımından daha güclü ola bilərsiniz. Başqalarının həyat tərzinə uyğunlaşmağa çalışmaq əvəzinə, seçimlərinizi öz prioritetlərinizə əsasən edin.

4. Bir neçə gəlir mənbəyi yaradın

Əməkhaqqınız əsas gəlir mənbəyiniz ola bilər. Lakin uzunmüddətli məqsədiniz yalnız maaşdan asılı olmadan yaşaya bilmək olmalıdır.

Yığdığınız vəsaiti artırmaq üçün müxtəlif investisiya imkanlarını araşdırın. Səhmlərə, istiqrazlara, daşınmaz əmlaka və ya digər gəlir gətirən sahələrə yatırım edə bilərsiniz. İnvestisiyaları müxtəlif istiqamətlərə bölmək riski azaltmağa kömək edir.

Kirayə verilən daşınmaz əmlak davamlı gəlir mənbəyinə çevrilə bilər. Hətta əldə olunan gəlir ipoteka ödənişləri, vergilər və digər xərclərə sərf olunsa belə, əmlak üzərində mülkiyyət payınız artdığı üçün uzunmüddətli qazanc əldə etmiş olursunuz.

Bundan başqa, istifadə etmədiyiniz əşyaları onlayn platformalarda satmaq, boş vaxtınızda əlavə işlə məşğul olmaq və ya repetitorluq etmək kimi əlavə gəlir mənbələri yaratmaq mümkündür.

Bu gəlir mənbələrini inkişaf etdirərkən daha böyük biznes imkanlarını da diqqətdə saxlayın. Uğurlu biznes qurmaq uzunmüddətli perspektivdə yalnız vaxtınızı pula dəyişməkdən daha böyük gəlir gətirə bilər.

5. Borclarınızı vaxtından əvvəl ödəyin

Kredit kartı borcunuz varsa, ilk növbədə onun bağlanmasına üstünlük verin. Kredit kartlarının faiz dərəcələri çox vaxt investisiyalardan əldə edilə biləcək gəlirdən daha yüksək olur. Bu səbəbdən borcu saxlamaq əvəzinə onu ödəmək daha sərfəlidir.

Avtomobil krediti və ipoteka kimi borcları vaxtından əvvəl ödəməklə uzun müddətdə böyük məbləğdə faiz xərclərinə qənaət etmək mümkündür. Borclar bağlandıqdan sonra həmin vəsaiti yığım və investisiyalara yönəldin. Bu zaman kapitalınızın nə qədər sürətlə artdığına şahid ola bilərsiniz.

Maliyyə intizamına riayət etmək və düzgün xərcləmə vərdişləri formalaşdırmaq sizi varlanmaq yolunda mühüm addımlara yaxınlaşdıracaq. Düzgün maliyyə davranışı həm sərvətinizi daha sürətlə artırmağa, həm də maliyyə müstəqilliyinə daha az vəsaitlə çatmağa imkan verə bilər.

Tənzilə Ağabalayeva