Texnologiya sahəsində ən uğurlu 10 investorla tanış olun

Dünyada uzaqgörən və yenilikçi ideyaları sayəsində milyardlarla dollar qazanan texnologiya investorları var. Müasir dövrdə texnologiyanın sürətlə inkişaf etdiyi bir vaxtda bu investorlar öz uğurları ilə başqaları üçün ilham mənbəyinə çevriliblər.

Belə investorların siyahısı aşağıdakı kimidir:

1. Cim Gets

Ən uğurlu 10 texnologiya investoru arasında Cim Gets birinci yerdə qərarlaşıb. Onun sərmayə qoyduğu "WhatsApp" tətbiqi dünyanın ən populyar mesajlaşma platformasına çevrildikdən sonra o, nağd və səhm şəklində 21,8 milyard ABŞ dolları gəlir əldə edib. Bununla kifayətlənməyən investor bazara yeni uğurlu tətbiqlər təqdim etməyi planlaşdırır.

2. Piter Fenton

Piter Fenton "Twitter" sosial şəbəkəsinin idarə heyətinin üzvlərindən biridir. O, fəaliyyətini həm istehlakçı yönümlü, həm də korporativ şirkətlər arasında bölüşdürür. Piter eyni gündə birjaya çıxarılan "Hortonworks" və "New Relic" şirkətlərinə etdiyi investisiyalarla tanınır. O, aparıcı vençur kapitalı şirkəti "Benchmark"ın beş tərəfdaşından biridir.

3. Kris Sakka

Kris Sakkanın "Lowercase Capital" şirkəti "Instagram"ın ilk investorlarından biri olub. Bundan əlavə, o, "Twitter" və "Uber" şirkətlərinə də sərmayə yatırıb. Kris həmçinin "Stripe", "Twilio", "Docker", "Lookout" və "Automatic" şirkətlərinə investisiya edib.

4. Coş Kopelman

Coş Kopelman xüsusilə "LinkedIn"ə etdiyi uğurlu investisiya ilə seçilir. O, istehlakçı texnologiyaları, korporativ proqram təminatı, moda və maliyyə sahələrinə maraq göstərir. O, "Micro VC" investorları qrupuna daxildir və son dövrlərdə "AltSchool", "Move Loot", "Boxed", "Soldsie" və "Black Tux" şirkətlərinə sərmayə yatırıb.

5. Stiv Anderson

Stiv Anderson "Baseline Ventures" şirkətinin təsisçilərindən və tərəfdaşlarından biridir. O, "Instagram"ın ilk investorlarından, həmçinin "Twitter"ın təsisçi investorlarından hesab olunur. Hazırda o, sosial maliyyə layihələri, "Weebly" və oyun şirkəti olan "Machine Zone" ilə bağlı fəaliyyət göstərir.

6. Duqlas Leone

Duqlas Leone nüfuzlu vençur kapitalı şirkəti "Sequoia Capital"ın idarəedici tərəfdaşıdır. Texnologiya investoru kimi o, "Google", "YouTube", "Zappos" və "LinkedIn" şirkətlərinə etdiyi sərmayələrdən böyük gəlir əldə edib. O, fəaliyyətini Hindistan, Çin və İsrail də daxil olmaqla bir sıra ölkələrə genişləndirib.

7. Pol Madera

Pol Madera 1999-cu ildə "Meritech" vençur kapitalı şirkətini təsis edib. O, xüsusilə "Facebook"a etdiyi investisiya sayəsində texnologiya sahəsində aparıcı mövqeyini qoruyub saxlayıb. Hazırda "Glaukos" və böyük verilənlər sahəsində fəaliyyət göstərən "DataStax" şirkətlərinə iri həcmli sərmayələri ilə diqqət çəkir.

8. Nil Şen

Nil Şen Çində fəaliyyət göstərən "Sequoia Capital"ın idarəedici tərəfdaşıdır. O, daha çox səyahət şirkəti olan "Ctrip.com"un həmtəsisçisi və prezidenti kimi tanınır. Texnologiya investisiyalarından əlavə, o, otellər şəbəkəsinin idarə olunması ilə də məşğuldur.

9. Bill Qerli

Bill Qerli uzun illərdir ki, nüfuzlu vençur kapitalı şirkəti "Benchmark"da fəaliyyət göstərir. Bu şirkət bir çox tanınmış texnologiya layihələrinə investisiya edib. Bundan əlavə, Qerli "Nextdoor" şirkətinin idarə heyətinin üzvüdür. Təcrübəli investor kimi o, daim yeni texnologiya investisiyası imkanlarını araşdırır.

10. Cenni Li

Cenni Li Çində ən nüfuzlu texnologiya investorlarından biri hesab olunur. Hazırda o, "Yudo1", "Chukong Technologies" və "China Talent Group" kimi şirkətlərlə bağlı iri layihələrdə iştirak edir. Reaktiv təyyarə və pilotsuz uçuş aparatları üzrə mühəndis olan Cenni Çin investisiya bazarında 10 milyon ABŞ dolları həcmində maliyyələşdirmə raunduna rəhbərlik edib.

Texnologiya investorları bu sahəyə yönəltdikləri böyük sərmayələr sayəsində dünyada əsl inqilab yaradıblar. Onlar ünsiyyət imkanlarını və insanların həyat tərzini əhəmiyyətli dərəcədə dəyişdiriblər.

Tənzilə Ağabalayeva