Cisco 46% bahalaşıb, Oracle 25% ucuzlaşıb

Texnologiya şirkətləri hər zaman sürətli böyümə nümayiş etdirməsələr də, uzunmüddətli investorlar üçün cəlbedici seçim olaraq qalırlar. Bu baxımdan şəbəkə texnologiyaları sahəsində fəaliyyət göstərən Cisco və proqram təminatı nəhəngi Oracle süni intellekt dövründə mühüm mövqeyə malik şirkətlər hesab olunur.

Şirkətlərin hər ikisi investorlarına müntəzəm dividend ödəyir və uzun illərdir dividendlərini artırır. Buna görə də gəlir yönümlü investorlar üçün bu iki texnologiya nəhənginin müqayisəsi xüsusi maraq doğurur.

Cisco Systems

Cisco dünyada ən böyük şəbəkə avadanlığı istehsalçılarından biridir. Şirkət müəssisələr üçün şəbəkə infrastrukturu, proqram təminatı və kibertəhlükəsizlik həlləri təqdim edir. Hazırda Cisco-nun bazar kapitallaşması təxminən 461 milyard ABŞ dollarıdır.

2026-cı ilin əvvəlindən etibarən Cisco səhmləri təxminən 46% bahalaşıb. Son 52 həftə ərzində isə səhmlər təxminən 66–130 ABŞ dolları aralığında ticarət olunub.

Oracle

Oracle uzun illərdir verilənlər bazası texnologiyaları ilə tanınsa da, hazırda bulud infrastrukturu və korporativ proqram təminatı sahəsində də əsas oyunçulardan biridir. Şirkətin bazar kapitallaşması təxminən 410 milyard ABŞ dolları təşkil edir.

Buna baxmayaraq, Oracle səhmləri 2026-cı ilin əvvəlindən bəri təxminən 25% ucuzlaşıb. Son bir ildə səhmlər 135–346 ABŞ dolları diapazonunda dəyişib.

Maliyyə göstəricilərinin müqayisəsi

Son maliyyə nəticələrinə əsasən Oracle gəlir və mənfəət baxımından daha güclü artım nümayiş etdirib.

Cisco

Gəlir: 15,8 milyard dollar

Xalis mənfəət: 3,4 milyard dollar

İrəliyə hesablanmış P/E: 33,19

Qiymət/Satış (P/S): 8,17

Oracle

Gəlir: 19,2 milyard dollar

Xalis mənfəət: 4,3 milyard dollar

İrəliyə hesablanmış P/E: 22,71

Qiymət/Satış (P/S): 6,27

Oracle-ın gəlirləri illik müqayisədə 21%, xalis mənfəəti isə 25,6% artıb. Cisco-da isə gəlirlər 12%, xalis mənfəət isə 35% yüksəlib.

Qiymətləndirmə baxımından da Oracle daha sərfəli görünür. Şirkətin P/E göstəricisi Cisco-dan aşağı olmaqla yanaşı, texnologiya sektorunun orta göstəricisindən də aşağıdır. Eyni zamanda Oracle-ın P/S əmsalı da Cisco ilə müqayisədə daha aşağıdır ki, bu da investorların hər 1 dollar satış gəliri üçün daha az vəsait ödədiyini göstərir.

Dividend baxımından hansı öndədir?

Cisco hər səhm üzrə illik 1,68 ABŞ dolları dividend ödəyir. Dividend gəlirliliyi təxminən 1,4%, dividend ödəniş əmsalı isə 48,16% təşkil edir.

Oracle isə hər səhm üzrə illik 2,00 ABŞ dolları dividend ödəyir. Dividend gəlirliliyi yenə təxminən 1,4% olsa da, dividend ödəniş əmsalı 30,76% səviyyəsindədir. Bu isə şirkətə həm investisiyaları artırmaq, həm də gələcəkdə dividend ödənişlərini yüksəltmək üçün daha geniş imkan yaradır.

Hər iki şirkət ardıcıl olaraq on ildən artıq müddətdə dividendlərini artırıb.

Analitiklərin gözləntiləri

Wall Street-də 25 analitik Cisco səhmlərinə ümumilikdə "Moderate Buy" (Orta səviyyədə al) reytinqi verib. Analitiklərin hədəf qiymətləri növbəti 12 ay ərzində səhmlərin 15–33% bahalaşa biləcəyini göstərir.

Oracle-a münasibət isə daha müsbətdir. 43 analitik şirkətin səhmlərini "Strong Buy" (Güclü al) kimi qiymətləndirir. Ən optimist hədəf qiymət reallaşacağı təqdirdə, səhmlərin 185%-ə qədər yüksəlmə potensialı olduğu bildirilir.

Tənzilə Ağabalayeva