Daha yaxşı dünyanın qurucuları: Tikinti və memarlıq sahəsində dünyanın ən uğurlu və innovativ şirkətləri

Yaşadığımız fiziki mühit böyük ölçüdə insanların inşa etdiyi tikililərdən ibarətdir. Bu tikililər gündəlik həyatımızı asanlaşdıran müxtəlif funksiyalar yerinə yetirir.

İstər evimizdə istirahət edərkən, istərsə də müasir ofislərdə işləyərkən ətrafımızdakı memarlıq mühiti həyat tərzimizə və dünyagörüşümüzə təsir göstərir.

Lakin insanların çoxu bu məkanların necə layihələndirildiyini və inşa olunduğunu düşünmədən onları adi qəbul edir.

İstənilən yaşayış binasına və ya ictimai obyektə daxil olarkən ilk diqqət çəkən məqamlardan biri onun memarlıq həlli və dizaynıdır.

Texniki detalları hər kəs bilməsə də, yaxşı layihələndirilmiş məkanın yaratdığı təəssüratı qiymətləndirmək çətin deyil. Tikinti və memarlıq sahəsində çalışan mütəxəssislər hər gün yeni yanaşmalar tətbiq etməklə bu sahənin sərhədlərini genişləndirir və insanların yaşayış məkanlarına münasibətini dəyişirlər.

Müasir dövrdə binaların layihələndirilməsi və tikintisi ilə məşğul olan şirkətlər getdikcə daha mürəkkəb layihələr həyata keçirir, yaradıcı ideyaları innovativ həllərlə birləşdirərək şəhər mühitini yenidən formalaşdırırlar.

Aşağıda dünyanın müxtəlif şəhərlərinin simasını dəyişən ən uğurlu memarlıq və tikinti şirkətlərindən bəziləri təqdim olunur:

"Heatherwick Studio"

"Heatherwick Studio" fərqli memarlıq üslubundan daha çox öz iş metodologiyası ilə tanınır. Şirkət hər bir layihədə sənətkarlıq elementlərini innovativ yanaşmalarla birləşdirərək sifarişçilərin tələblərini yaradıcı şəkildə həyata keçirməyə çalışır.

Londonda fəaliyyət göstərən və britaniyalı dizayner Tomas Hedervik tərəfindən təsis edilən şirkət 2010-cu ildə Şanxayda keçirilən Ümumdünya Sərgisində Böyük Britaniya pavilyonunun, eləcə də Sinqapurdakı "Nanyang Technological University"nin Tədris Mərkəzinin layihələndirilməsi ilə geniş tanınıb.

"Rockwell Group"

"Rockwell Group" yalnız memarlıq şirkəti deyil, eyni zamanda müxtəlif sahələri əhatə edən multidissiplinar dizayn təşkilatıdır. Şirkət memarlıq, interyer dizaynı və korporativ brendinq kimi müxtəlif xidmətlər göstərir.

Nyu-York və Madriddə ofisləri yerləşən şirkət Atlantik okeanının hər iki sahilində və digər regionlarda çoxsaylı layihələr həyata keçirib. Komanda innovativ yanaşmaları ilə insanları həm təəccübləndirməyə, həm də maarifləndirməyə çalışır.

"MMA Architects"

Müasir tikinti sənayesi yalnız yaşayış binalarını deyil, həm də ticarət və qarışıq təyinatlı kompleksləri əhatə edir. "MMA Architects" bu istiqamətdə aparıcı şirkətlərdən biri hesab olunur.

Vaşinqton və Nyu-Cersi ştatlarında fəaliyyət göstərən şirkət 20 ildən artıq təcrübəyə malikdir. Bu müddət ərzində "Best Buy", "Walmart" və "Volvo" kimi iri şirkətlərlə əməkdaşlıq edib.

"Svigals + Partners"

"Svigals + Partners" fəaliyyətində icma anlayışına xüsusi önəm verir. Şirkət insanların ehtiyaclarını ön plana çıxaran məkanların layihələndirilməsinə üstünlük verir və xüsusilə təhsil müəssisələrinin layihələndirilməsi sahəsində zəngin təcrübəyə malikdir.

Şirkətin əsas prinsiplərindən biri ekoloji memarlıq və dayanıqlı inkişaf konsepsiyalarının bütün layihələrə tətbiq edilməsidir. Bunun nəticəsində yaradılan obyektlər həm istifadəçilər, həm də ətraf mühit üçün əlverişli olur.

"NBBJ"

"NBBJ" məhsuldarlıq və ekoloji davamlılıq arasında tarazlıq yaradan layihələri ilə seçilir. Şirkət innovativ və praktik həlləri bir araya gətirərək müasir tikinti sahəsində mühüm uğurlar əldə edib.

Şimali Amerika, Avropa və Asiyanı əhatə edən qlobal şəbəkəyə malik olan şirkət memarlıq, landşaft memarlığı, şəhərsalma və məsləhət xidmətləri sahəsində uzun illərdir fəaliyyət göstərir.

"C.F. Moller Architects"

Müasir memarlıq layihələri müxtəlif sahələr üzrə bilik və təcrübə tələb edir. "C.F. Moller Architects" bu ehtiyacları uğurla qarşılayan şirkətlərdən biridir.

Danimarkanın ən qədim və ən böyük memarlıq şirkətlərindən biri olan müəssisə landşaft memarlığı, məhsul dizaynı, səhiyyə obyektlərinin planlaşdırılması və idarəetmə üzrə məsləhət xidmətləri daxil olmaqla geniş fəaliyyət istiqamətlərinə malikdir.

"Perkins+Will"

"Perkins+Will" insanların həyatına müsbət təsir göstərə biləcək tikinti layihələrinin hazırlanmasına üstünlük verir. Şirkət bütün layihələrini sifarişçilərin ehtiyaclarına uyğun şəkildə həyata keçirir.

Dörd qitədə fəaliyyət göstərən şirkət səhiyyə, nəqliyyat, mehmanxana biznesi, təhsil, idman, elm və texnologiya kimi müxtəlif sahələrdə çoxsaylı layihələrə rəhbərlik edib.

"The Living"

Müasir dizayn şirkətlərinin əksəriyyəti müxtəlif memarlıq yanaşmalarını birləşdirir. Nyu-Yorkda yerləşən "The Living" isə bioloji və texnoloji həlləri eyni layihədə uğurla inteqrasiya etməsi ilə fərqlənir.

Şirkət generativ dizayn və biologiya prinsiplərini mədəniyyət və texnologiya ilə əlaqələndirərək bir-birindən fərqli memarlıq yanaşmalarını vahid və çevik konsepsiyada birləşdirir.

"Houzz"

Bu siyahıda yer alan digər şirkətlərdən fərqli olaraq, "Houzz" memarlıq və ya dizayn şirkəti deyil. Platforma daha çox interyer dizaynı ilə maraqlanan insanlar üçün sosial şəbəkə və məlumat mübadiləsi platforması funksiyasını yerinə yetirir.

Alon Koen və Adi Tatarko tərəfindən yaradılan bu platforma istifadəçilərə peşəkar interyer dizaynerlərinin metodlarından yararlanmaq, digər istifadəçilərlə ünsiyyət qurmaq və evlərinin dizaynını yaxşılaşdırmaq üçün faydalı məsləhətlər əldə etmək imkanı yaradır.

"Bjarke Ingels Group"

"Bjarke Ingels Group" (BIG) hazırda dünyanın ən məşhur və ən çox sifariş alan memarlıq şirkətlərindən biri hesab olunur. Şirkət danimarkalı memar Byarke İnqels tərəfindən təsis edilib və qısa müddətdə innovativ memarlığın aparıcı mərkəzlərindən birinə çevrilib.

Byarke İnqels və komandası mürəkkəb şəhər mühitləri üçün yeni memarlıq həlləri hazırlayaraq insanların urbanizasiya olunmuş ərazilərdə daha harmonik yaşamalarını təmin etməyə çalışırlar. Müasir və cəsarətli yanaşmaları sayəsində BIG hər yeni layihə ilə şəhərlərin memarlıq simasını dəyişməyi qarşısına məqsəd qoyur.

Tənzilə Ağabalayeva