"Tesla" rüblük gəlirini açıqladı

"Tesla" 2026-cı ilin ikinci rübündə gəlirlərini illik müqayisədə 26% artıraraq 28,24 milyard dollara çatdırıb. Bu göstərici analitiklərin 25,71 milyard dollarlıq proqnozunu üstələyib.

Valyuta.az xəbər verir ki, şirkətin səhm üzrə düzəldilmiş mənfəəti 33 sent olub. Bu isə bazarın 51 sentlik gözləntilərindən aşağı qalıb. Maliyyə nəticələrinin açıqlanmasından sonra "Tesla"nın səhmləri birjadan sonrakı ticarətdə təxminən 4% ucuzlaşıb.

Şirkətin xalis mənfəəti illik müqayisədə 5% azalaraq 1,11 milyard dollara, əməliyyat mənfəəti isə 57% azalaraq 398 milyon dollara enib.

İkinci rübdə "Tesla" 480 min 126 avtomobil təhvil verib ki, bu da ötən ilin eyni dövrü ilə müqayisədə 25% çoxdur. Avtomobil satışlarından əldə olunan gəlirlər isə 23% artaraq 20,5 milyard dollara yüksəlib.

Şirkətin süni intellekt, robotaksi, yarımkeçiricilər, batareyalar və "Optimus" humanoid robot layihələrinə yatırımlarının artması nəticəsində kapital xərcləri 142% artaraq 5,79 milyard dollara çatıb. Bu səbəbdən "Tesla" ikinci rübdə 1,09 milyard dollar mənfi sərbəst pul axını qeydə alıb.

Bundan başqa, şirkət "Cybercab" adlı sükanı və pedalı olmayan tam avtonom avtomobilinin istehsalına Texasdakı zavodunda başladığını açıqlayıb. "Tesla" həmçinin robotaksi xidmətinin ABŞ-ın bir sıra şəhərlərində genişləndirildiyini bildirib.

Sərvanə Rəmixanova