"Uber"in həmtəsisçisinin startapı 1,7 milyard dollar investisiya cəlb edib

Süni intellekt və robototexnika sahəsində fəaliyyət göstərən “Atoms” 1,7 milyard dollar investisiya cəlb edib. İnvestisiya raunduna “Andreessen Horowitz” rəhbərlik edib. 

Valyuta.az xəbər verir ki, investisiyadan sonra “Andreessen Horowitz”in həmtəsisçisi Ben Horovits (Ben Horowitz) şirkətin direktorlar şurasına qoşulub. Şirkətin bazar dəyəri isə açıqlanmayıb.

Şirkət bildirib ki, cəlb olunan vəsait robototexnika və avtomatlaşdırma texnologiyalarının inkişafına, mühəndis heyətinin genişləndirilməsinə və fiziki sektorlarda istifadə olunacaq avtonom sistemlərin hazırlanmasına yönəldiləcək.

“Atoms” “Uber”in həmtəsisçisi Travis Kalanik (Travis Kalanick) tərəfindən yaradılıb və istehsal, logistika, mədənçilik və digər fiziki sahələrdə süni intellekt və robototexnika texnologiyalarının tətbiqini genişləndirməyi hədəfləyir.

Bu məqsədlə şirkət ağır sənaye avtomatlaşdırılması üzrə fəaliyyət göstərən “Pronto” şirkətini də öz tərkibinə qatıb. “Pronto” mədənçilik və sənaye nəqliyyat vasitələri üçün avtonom idarəetmə texnologiyaları hazırlayır.

“Atoms”un uzunmüddətli məqsədi fiziki istehsal proseslərini daha səmərəli etmək, avtomatlaşdırmanı genişləndirmək və proqram təminatı ilə idarə olunan sənaye ekosistemi formalaşdırmaqdır.

Mayya Hüseynova