Təqdimat hazırlamağı asanlaşdıran 10 süni intellekt aləti - FOTOLAR

Əvvəllər saatlarla vaxt aparan təqdimat hazırlama prosesi artıq süni intellekt dəstəyi sayəsində cəmi bir neçə dəqiqəyə mümkün olur. Yeni nəsil bu platformalar sayəsində cəmi bir neçə cümlə ilə peşəkar, vizual baxımdan cəlbedici təqdimatlar yaratmaq mümkündür.

Valyuta.az təqdimat hazırlama prosesini sürətləndirən 10 populyar süni intellekt alətini təqdim edir.

1. Chronicle

"Chronicle" mövcud qeydləri, sənədləri və ya veb səhifələri interaktiv təqdimatlara çevirməyə imkan verir. İstifadəçi sıfırdan başlaya və ya PDF, PowerPoint və ya sayt linki yükləyə bilər. Sistem mətnləri avtomatik analiz edərək vizual baxımdan güclü, səliqəli təqdimat yaradır. "Chronicle" həmçinin brend rəngləri, loqo və yazı tiplərinə uyğunlaşdırma imkanı da verir.

2. Decktopus AI

"Decktopus AI" təqdimat hazırlama prosesini sürətləndirən süni intellekt platformasıdır. İstifadəçi sadəcə bir cümləlik komanda daxil edir, alət isə avtomatik şəkildə məzmun, dizayn və şəkil təkliflərini hazırlayır. Sürüklə-burax redaktoru, stok şəkillər, brend rəngləri və PDF faylları interaktiv təqdimatlara çevirmə funksiyaları ilə seçilir.

3. Gamma

"Gamma" istənilən mətni bir neçə dəqiqə ərzində dinamik təqdimata çevirir. Ağıllı şablonlar, tema variantları və avtomatik məzmun təklifləri təqdim edir. İstifadəçilər qeydlərini və ya PowerPoint fayllarını Gamma-ya yükləyərək müasir dizaynda təqdimatlar yarada bilirlər. Bundan əlavə, sosial media paylaşımları və veb səhifə dizaynları hazırlamaq da mümkündür.

4. KindlePPT

Mövzuya uyğun dizayn təklifləri və avtomatik şəkil əlavəetmə funksiyası ilə təqdimatları tez hazırlamağa kömək edir. Hazırlanan təqdimatlar kompüterə endirildikdən sonra redaktə olunur. Bundan əlavə, KindlePPT ilə viktorinalar, infoqrafiklər və YouTube kontent axışları da yaratmaq mümkündür.

5. Plus AI

"Google Slides" və PowerPoint istifadəçiləri üçün yaradılmış Plus AI, cəmi bir neçə cümləlik tapşırıqla peşəkar təqdimatlar yaradır. Alət mətnləri yenidən yaza, qrafik və şəkilləri avtomatik əlavə edə bilir. Həmçinin brend rənglərinə uyğun dizaynlar təklif edərək korporativ təqdimatlar üçün böyük rahatlıq yaradır.

6. PageOn

"PageOn" sadəcə bir komanda ilə interaktiv və vizual baxımdan zəngin təqdimatlar yaradır. O, yalnız slaydlarla məhdudlaşmır; 3D modellər, diaqramlar, qrafiklər və media faylları kimi elementlər də əlavə edə bilir. Bu, fikirlərin daha dinamik və təsirli formada təqdim olunmasını təmin edir.

7. Pitch Avatar

"Pitch Avatar təqdimatlara danışan süni intellekt avatarı əlavə etməyə imkan verir. Avatar təqdimatı səsləndirir, suallara cavab verir və iştirakçılardan rəy toplaya bilir. 70-dən çox dili, o cümlədən Azərbaycan və Türk dillərini dəstəkləyir. Alət həm də müştəri cəlbi, təlim və fərdi reklam kampaniyaları üçün istifadə oluna bilər.

8. Slideoo

"Slideoo" PDF, mətn, veb səhifə və ya YouTube videolarını təsirli təqdimatlara çevirir. 200 səhifəyə qədər sənədləri və uzun videoları işləyə bilir. Komanda işi üçün ayrıca sahələr və layihə idarəetmə funksiyaları təqdim edir.

9. Snapdeck

"Snapdeck" veb axtarış və Notion inteqrasiyası ilə komanda əsaslı təqdimatlar yaratmağa imkan verir. İstifadəçi əvvəlcə təqdimat kateqoriyasını və temasını seçir, sistem isə avtomatik məzmun hazırlayır. Daxili süni intellekt köməkçisi məzmunun redaktəsində dəstək olur.

10. Wonderslide

"Wonderslide" mövcud təqdimat fayllarını süni intellektlə təhlil edib müasir dizaynda yenidən yaradır. İstifadəçi bu faylı yüklədikdən sonra redaktə edə bilir. İstəyə görə sıfırdan da komanda ilə yeni təqdimat hazırlamaq mümkündür. Hazır faylı paylaşılabilir linklə göndərmək də mümkündür.

Süni intellekt əsaslı təqdimat alətləri dizayn biliyi olmadan peşəkar, dinamik və brend uyğun təqdimatlar yaratmağı asanlaşdırır. Xüsusilə Chronicle, Decktopus, Gamma və Plus AI sürət, dizayn keyfiyyəti və istifadədə rahatlıq baxımından fərqlənir.

Sərvanə Rəmixanova