NBA tarixində ən bahalı 8 müqavilə

National Basketball Association dünyanın ən nüfuzlu basketbol liqası hesab olunur. Liqanın populyarlığının və gəlirlərinin artması nəticəsində oyunçuların maaşları da ildən-ilə rekord həddə yüksəlib. Maaş limitinin (salary cap) artırılması ilə bağlı oyunçular və klub rəhbərləri arasında aparılan danışıqlar NBA tarixinin ən bahalı müqavilələrinin imzalanmasına şərait yaradıb.

Aşağıda NBA tarixində ən yüksək məbləğli səkkiz müqavilə təqdim olunur.

1. Giannis Antetokounmpo – 5 il, 228 milyon dollar

NBA tarixinin ən bahalı müqaviləsi NBA çempionu və Final seriyasının Ən Dəyərli Oyunçusu (Finals MVP) Giannis Antetokounmpoya məxsusdur. "Greek Freak" ləqəbi ilə tanınan basketbolçu 2020-ci ildə Milwaukee Bucks ilə 5 illik, 228 milyon dollarlıq "supermaks" müqavilə imzalayıb.

Bu müqavilə onun kluba sadiqliyinin göstəricisi idi. Antetokounmpo bildirmişdi ki, şəhərə çempionluq qazandırmadan komandadan ayrılmayacaq. Bir neçə ay sonra Milwaukee Bucks 50 ildən sonra ilk NBA çempionluğunu qazandı.

Final seriyasında orta hesabla 35,2 xal, 13,2 ribaund və 5 məhsuldar ötürmə edən Antetokounmpo müntəzəm mövsümün MVP-si, Final MVP-si və İlin Ən Yaxşı Müdafiəçisi mükafatlarını qazanan nadir oyunçulardan biridir.

2. Stephen Curry – 4 il, 215 milyon dollar

2017-ci ildə 201 milyon dollarlıq müqaviləyə imza atan üçqat NBA çempionu və ikiqat MVP Stephen Curry daha sonra Golden State Warriors ilə 4 illik, 215 milyon dollarlıq yeni müqavilə bağladı.

Müqavilənin müddəti 2025–26 mövsümünün sonuna qədər nəzərdə tutulmuşdu. Curry həmin vaxta qədər 38 yaşında olsa da, yüksək oyun səviyyəsini qoruyacağı gözlənilirdi. O, NBA tarixinin ən yaxşı üçlük atıcılarından biri hesab olunur.

3. Trae Young – 5 il, 207 milyon dollar

2021-ci il NBA pley-offundakı möhtəşəm çıxışından sonra Trae Young Atlanta Hawks ilə 5 illik, 207 milyon dollarlıq müqavilə imzaladı.

O, komandasını uzun illərdən sonra yenidən pley-offa və Şərq Konfransının finalına çıxarmağı bacardı. Mövsüm ərzində orta hesabla 28 xal, 9,5 məhsuldar ötürmə və 37,7 dəqiqə ilə komandanın lideri oldu.

4. Luka Dončić – 5 il, 207 milyon dollar

NBA-nın gələcək superulduzlarından biri hesab edilən Luka Donçiç də Dallas Mavericks ilə 207 milyon dollarlıq müqavilə imzalayıb.

Sloveniyalı basketbolçu 2018-ci ildə NBA-ya gəldikdən sonra qısa müddətdə liqanın ən parlaq oyunçularından birinə çevrilib. O, bundan əvvəl Avropada peşəkar basketbol oynayır və cəmi 16 yaşında İspaniya çempionatında çıxış edən ən gənc oyunçulardan biri olmuşdu.

5. Russell Westbrook – 5 il, 205 milyon dollar

Triple-dabl rekordçusu Russell Westbrook 2017-ci ildə Oklahoma City Thunder ilə 5 illik, 205 milyon dollarlıq müqavilə bağlamışdı.

Daha sonra Houston Rockets, Washington Wizards və Los Angeles Lakers komandalarında çıxış etsə də, yüksək səviyyəli oyununu davam etdirdi.

6. Kevin Durant – 4 il, 198 milyon dollar

Üçqat Olimpiya çempionu və ikiqat Final MVP-si Kevin Durant Brooklyn Nets ilə 4 illik, 198 milyon dollarlıq müqavilə imzalayıb.

Axilles vətərinin ciddi zədəsini sağaltdıqdan sonra meydanlara uğurla qayıdan Durant mövsüm ərzində orta hesabla 27 xal, 7 ribaund və 5 məhsuldar ötürmə ilə çıxış edib.

7. Damian Lillard – 4 il, 196 milyon dollar

2012-ci ildən etibarən Portland Trail Blazers formasını geyinən Damian Lillard komandanın simvollarından birinə çevrilib.

Klub rəhbərliyi 2019-cu ildə ona 4 illik, 196 milyon dollarlıq müqavilə təklif edib. Lillard uzun illər Portlandda qalmaq istədiyini dəfələrlə bəyan etsə də, komandanın yenidənqurma mərhələsinə keçməsi onun gələcəyi ilə bağlı müxtəlif müzakirələr yaradıb.

8. James Harden – 4 il, 170 milyon dollar

Houston Rockets klubunun uzun illər əsas ulduzu olan James Harden 2017-ci ildə 170 milyon dollarlıq müqaviləyə imza atıb.

O, komandanın heyətində çoxsaylı qol rekordları qırıb və 2018-ci ildə mövsümün Ən Dəyərli Oyunçusu seçilib. Daha sonra isə çempionluq uğrunda mübarizə aparmaq məqsədilə Brooklyn Nets klubuna transfer olunub və burada Kevin Durant və Kyrie Irving ilə birlikdə çıxış edib.

Tənzilə Ağabalayeva