Son illərdə böyük maliyyə alan, qadın rəhbərliyində olan 10 startap

Texnologiya və startap dünyasında rekord maliyyələşmə xəbərləri tez-tez gündəmə çıxsa da, bu uğurlara kimlərin çatdığı sualı hər zaman aktualdır. İnnovasiya mərkəzi kimi tanınan texnologiya sektorunda qadın liderlər hələ də azlıq təşkil edir. Sistemli maliyyə baryerləri davam etsə də, son illərdə mühüm uğurlar qazanan qadın rəhbərlər investor inamını qazanaraq milyonlarla avroluq maliyyə təmin ediblər.

Valyuta.az qadın sahibkarların böyük maliyyə raundları bağlayaraq bazarda mövqelərini möhkəmləndirdiyi 10 startapı təqdim edir.

Enn Boden – “Starling Bank” (Böyük Britaniya)

Tanınmış bankir Enn Boden 2014-cü ildə ənənəvi bankçılığın köhnəlmiş sistemlərinə alternativ olaraq tam rəqəmsal “Starling Bank”ı qurub. Müştəri məmnuniyyətində lider olan bank 2022-ci ilin aprelində 150 milyon avro maliyyə cəlb edib. Boden 2023-də CEO vəzifəsini tərk etsə də, hələ də bu sektorda nüfuzlu səs olaraq qalır.

Şarmeyn Çau – “GetHarley” (Böyük Britaniya)

Keçmiş korporativ hüquqşünas Şarmeyn Çau, 2019-cu ildə onlayn dəriyə qulluq platforması “GetHarley”i təsis edib. İstifadəçiləri dermatoloqlar və dəri mütəxəssisləri ilə birləşdirən platforma 2023-cü ilin iyununda 44,8 milyon avro maliyyə toplayıb.

Kler Novorol – “Ada Health” (Almaniya)

Həkim və pediatr olan Dr. Kler Novorol, süni intellekt əsaslı simptom qiymətləndirmə platforması “Ada Health”i qurub. Şirkət 2022-ci ilin fevralında 25,8 milyon avro maliyyə cəlb edərək ümumi investisiyasını 163 milyon avroya çatdırıb.

Dilyara Lupenko – “Impress” (İspaniya)

İnnovativ ortodontiya şəbəkəsi “Impress”in həmtəsisçisi və COO-su Dilyara Lupenko, şirkəti Avropanın ən böyük diş müalicə mərkəzlərindən birinə çevirib. 2024-cü ilin noyabrında 77 milyon avro maliyyə toplayıb.

Elina Berqlund – “Natural Cycles” (İsveç)

Fizika üzrə doktor Elina Berqlund, hormonal olmayan kontraseptiv tətbiq “Natural Cycles”i yaradıb. Dünyada həm Avropa, həm də ABŞ-da kontraseptiv kimi təsdiqlənmiş ilk tətbiqdir. 2024-cü ilin mayında 47,3 milyon avro maliyyə cəlb edib.

Eleonora Krespo – “Pigment” (Fransa)

Keçmiş "Google" əməkdaşı Eleonora Krespo, biznes planlaşdırma platforması “Pigment”i təsis edib. 2024-cü ilin aprelində 133 milyon avro maliyyə toplayaraq ümumi investisiyanı 396 milyon avroya çatdırıb.

Fanni Muazan – “Vestiaire Collective” (Fransa)

Lüks ikinci əl moda platforması “Vestiaire Collective”in həmtəsisçisi Fanni Muazan dövri iqtisadiyyat modelini modada populyarlaşdırıb. 2022-ci ilin dekabrında 75 milyon avro maliyyə cəlb edib.

Hübi – “The Exploration Company” (Fransa)

Kosmik tədqiqat sahəsində ixtisaslaşan “The Exploration Company”nin təsisçisi Elən Hübi, yenidən istifadə olunan kosmik kapsullar inkişaf etdirir. 2024-cü ilin noyabrında 150 milyon avro maliyyə toplayıb.

Lena Hekeloer – “Brite Payments” (İsveç)

Keçmiş Klarna rəhbərlərindən Lena Hekeloer, 2019-da “Brite Payments”i qurub. Ani bank ödənişləri xidmətləri təqdim edən fintech şirkəti 2023-cü ilin oktyabrında 60 milyon avro maliyyə cəlb edib.

Miçel Hi – “Abound” (Böyük Britaniya)

Ədalətli kredit sistemi yaratmaq məqsədilə qurulan “Abound”un COO-su Miçel Hi 2024-cü ilin fevralında rekord – 924,8 milyon avro maliyyə təmin edib. Ümumi investisiya həcmi 1,8 milyard avroya çatıb.

Mridula Por – “Peppy” (Böyük Britaniya)

İş yerlərində sağlamlıq dəstəyini gücləndirməyi hədəfləyən “Peppy” platformasının həmtəsisçisi Mridula Por 2023-cü ilin yanvarında 38,7 milyon avro maliyyə cəlb edib.