"Şirkətə işçi götürərkən bu sualı verirəm"

"Legora" İsveç mənşəli hüquq texnologiyaları sahəsində fəaliyyət göstərən startapdır. Şirkət süni intellekt əsaslı həllər vasitəsilə hüquq şirkətlərinin sənəd analizi, müqavilələrin işlənməsi və hüquqi proseslərin optimallaşdırılması istiqamətində məhsullar təqdim edir. Legora əsasən böyük hüquq firmaları və korporativ hüquq departamentləri üçün AI alətləri hazırlayır.

Valyuta.az xəbər verir ki, şirkətin baş direktoru Maks Cyunstrand (Max Junestrand) startapın formalaşma mərhələsindən etibarən həm məhsul strategiyasında, həm də komanda quruculuğunda aktiv rol oynayır.

"Artificial Lawyer" platformasına verdiyi müsahibədə Maks Cyunstrand qeyd edib ki, hüquq texnologiyaları bazarında dəyişikliklər sürətli olduğu üçün şirkət uzunmüddətli illik planlardan daha çox rüblük planlaşdırmaya üstünlük verir. Onun sözlərinə görə, çevik qərarvermə mexanizmi startap üçün strateji əhəmiyyət daşıyır.

Maks Cyunstrand beynəlxalq mediaya, o cümlədən "Business Insider" nəşrinə və “20VC” podkastına verdiyi müsahibələrdə bildirib ki, o, hələ də əsas namizədlərlə müsahibələrdə şəxsən iştirak edir.

Onun sözlərinə görə, seçim zamanı yalnız texniki bacarıqlar deyil, namizədin motivasiyası və şirkətin missiyasına münasibəti əsas meyarlardandır. Cyunstrand müsahibələr zamanı namizədlərə tez-tez belə bir sual ünvanladığını bildirib:

“Niyə çətin bir işi seçirsiniz? Siz daha rahat bir yerdə də işləyə bilərsiniz”.

CEO bu sual vasitəsilə namizədin uzunmüddətli perspektivini və çətin, intensiv iş mühitinə hazırlığını ölçdüyünü qeyd edib. Onun yanaşmasına görə, startap mühitində yalnız qısamüddətli maraqlarla deyil, missiyaya sadiqliklə işləyən əməkdaşlar daha davamlı nəticə verir.

Maks Cyunstrand müxtəlif platformalarda açıq müzakirələrdə də iştirak edir. O, Reddit üzərindən keçirilən “Ask Me Anything” formatlı sessiyada istifadəçilərin suallarını cavablandıraraq, Legora-nın məhsul inkişafı və hüquq sektorunda süni intellektin tətbiqi ilə bağlı fikirlərini bölüşüb.

Bu çıxışlarında o, süni intellektin hüquqşünasları əvəz etmək məqsədi daşımadığını, əksinə onların işini daha effektiv və sürətli etməyə yönəldiyini vurğulayıb.

Mayya Hüseynova