Saxlamaq, yoxsa alıb-satmaq? - Kriptovalyutaya investisiya strategiyası necə seçilməlidir?

Kriptovalyuta bazarında fəaliyyət göstərən investorlar qarşısında dayanan əsas suallardan biri budur: aktivləri uzun müddət saxlamaq daha məqsədəuyğundur, yoxsa qısamüddətli alqı-satqı əməliyyatları aparmaq? Mütəxəssislərin fikrincə, düzgün seçim bazarın vaxtını tutmaqdan çox, şəxsi məqsədlərdən, riskə dözümlülükdən və investora xas psixoloji xüsusiyyətlərdən asılıdır.

Uzunmüddətli saxlama strategiyası, yəni “HODL” kimi tanınan yanaşma, kriptovalyutanın gələcəkdə dəyər qazanacağına inama əsaslanır. Bu termin ilkin olaraq “hold” sözünün səhv yazılışı olsa da, sonradan “hold on for dear life” ifadəsinin qısaltması kimi populyarlaşıb. Bu strategiyanı seçən investorlar bazardakı qısamüddətli dalğalanmalara baxmayaraq, rəqəmsal aktivləri illərlə portfeldə saxlayırlar.

Maliyyə müşaviri və "Mitlin Financial" şirkətinin təsisçisi Lourens Spranq bildirir ki, uzunmüddətli investisiya ən azı beş illik dövr üçün planlaşdırılmalıdır. Onun sözlərinə görə, investor bazar enişləri zamanı panikaya düşməməli, əksinə, bəzi hallarda orta alış qiymətini azaltmaq üçün əlavə investisiya etməyi də nəzərdən keçirə bilər. Bu yanaşma həm bazar dəyişkənliyinin təsirini azaltmağa, həm də zamanla yığılan gəlir effektindən faydalanmağa imkan verir.

Digər tərəfdən, “flip” adlandırılan aktiv ticarət strategiyası qısamüddətli qiymət dəyişikliklərindən qazanc əldə etməyə yönəlib. Bu modeldə investorlar qiymət artımı baş verən kimi satış edir, eniş ehtimalı yarandıqda isə zərəri məhdudlaşdırmağa çalışırlar. Lakin mütəxəssislər xəbərdarlıq edirlər ki, bu üsul daha yüksək risk, davamlı bazar təqibi və ciddi intizam tələb edir. Kriptovalyuta bazarının yüksək dəyişkənliyi qısa müddətdə həm böyük qazanc, həm də ciddi itkilərlə nəticələnə bilər.

Vergi məsələləri də strategiya seçimində mühüm rol oynayır. ABŞ qanunvericiliyinə əsasən, kriptovalyuta əmlak kimi qiymətləndirilir və satışdan əldə olunan gəlir kapital qazancı vergisinə cəlb olunur. "Coinbase Learn" platformasının məlumatına görə, bir ildən artıq saxlanılan aktivlər daha aşağı – uzunmüddətli kapital qazancı dərəcəsi ilə vergiyə cəlb edilir. Bir ildən az müddətdə satılan aktivlər isə adi gəlir kimi daha yüksək dərəcə ilə vergiyə cəlb oluna bilər. Bu səbəbdən, bazarda qalma müddəti təkcə gəlir potensialına deyil, həm də vergi yükünə təsir göstərir.

Yüksək gəlirli investorlarla çalışan "Digital Ascension Group" şirkətinin nümayəndəsi Maks Averi qeyd edir ki, uzunmüddətli saxlama vergi baxımından daha sərfəli ola bilər. Bununla belə, hər iki yanaşmanın üstün və zəif tərəfləri mövcuddur və seçim fərdi vəziyyətdən asılıdır.

Mütəxəssislər investorlara qərar verməzdən əvvəl özlərinə bir neçə sual ünvanlamağı tövsiyə edirlər: riskə nə dərəcədə dözümlüyəm, bazarı gündə neçə dəfə yoxlayıram, portfelin qısa müddətdə ciddi dəyər itirməsinə emosional olaraq hazırammı və bazarları izləməyə kifayət qədər vaxt ayıra bilirəmmi? Bu suallar investisiya strategiyasının şəxsi xüsusiyyətlərlə uyğunlaşdırılmasına kömək edə bilər.

Bir çox hallarda hibrid model daha uyğun hesab olunur. Bu zaman investor portfelin əsas hissəsini uzunmüddətli saxlama üçün ayırır, daha kiçik hissə ilə isə qısamüddətli ticarət əməliyyatları aparır. Bu yanaşma həm sabit artım potensialını qorumağa, həm də bazardakı qısamüddətli imkanlardan yararlanmağa şərait yaradır.

Nəticə etibarilə, kriptovalyutaya investisiya üçün vahid düzgün strategiya mövcud deyil. Uğurlu yanaşma investorun məqsədlərindən, zaman üfüqündən və riskə münasibətindən asılıdır. Mütəxəssislər hesab edirlər ki, bazarı anlamaq qədər, şəxsi maliyyə davranışını düzgün qiymətləndirmək də uzunmüddətli uğurun əsas şərtidir.

Tənzilə Ağabalayeva