“Lassie” 75 milyon dollar investisiya alıb

İsveç mərkəzli “Lassie” 75 milyon dollar məbləğində C seriyası investisiya cəlb etdiyini açıqlayıb. 

Valyuta.az xəbər verir ki, startap 2023-cü ilin noyabr ayında isə 23 milyon avro investisiya cəlb etmişdi. Yeni maliyyələşmə mərhələsi ilə “Lassie” yenidən gündəmə gəlib.

2020-ci ildə təsis olunan şirkət cəlb edilən vəsaiti Avropada yeni bazarlara çıxışın genişləndirilməsinə, həmçinin süni intellekt dəstəkli zərər idarəetməsi və profilaktik sağlamlıq alətlərinin inkişafına yönəldəcəyini bildirib. “Lassie” Hedda Boverud Olsun (Hedda Boverud Olsén), Sofi Vilkinson (Sophie Wilkinson) və Yohan Yönsson (Johan Jönsson) tərəfindən yaradılıb.

Şirkət ev heyvanı sahibləri üçün rəqəmsal sığorta və sağlamlıq platforması təqdim edir. Ənənəvi sığorta modelindən fərqli olaraq, yalnız xəstəlik və ya qəza sonrası ödəniş mexanizmi ilə kifayətlənmir, eyni zamanda profilaktik baxımı təşviq edən sistem tətbiq edir. Mobil tətbiq vasitəsilə istifadəçilər sığorta polisini idarə edə və zərər tələblərini rəqəmsal şəkildə təqdim edə bilirlər.

Şirkət həmçinin qiymət formalaşdırılması, tələblərin qiymətləndirilməsi və müştəri idarəetməsi proseslərində süni intellekt texnologiyalarından istifadə edərək xidmətləri daha operativ və fərdiləşdirilmiş şəkildə təqdim etdiyini vurğulayır.

Mayya Hüseynova