“Rowspace” 50 milyon dollar investisiya alıb

Korporativ maliyyə üçün süni intellekt platforması hazırlayan “Rowspace” ümumilikdə 50 milyon dollar investisiya cəlb edib.

Valyuta.az xəbər verir ki, “Rowspace” yeni investisiyanı mühəndislik və tədqiqat komandalarını genişləndirmək, eləcə də süni intellekt platformasını daha da təkmilləşdirmək üçün istifadə edəcəyini açıqlayıb.

Maykl Manapat (Michael Manapat) və Yibo Linq (Yibo Ling) tərəfindən təsis edilən şirkət bu investisiya raundundan sonra rəsmi fəaliyyətə başlayıb. “Rowspace” məhsullarını korporativ investorlar və iri maliyyə komandaları üçün hazırlayır. Şirkət aktivlərin idarə edilməsi üzrə şirkətlərin, kredit fondlarının və investisiya komandalarının müxtəlif mənbələrdə dağınıq vəziyyətdə olan strukturlaşdırılmış və strukturlaşdırılmamış məlumatlarını vahid sistem altında birləşdirərək qərarvermə proseslərinin avtomatlaşdırılmasını hədəfləyir.

“Excel” maliyyə modelləri, investisiya komitəsi qeydləri, əvvəlki müqavilə analizləri, mühasibatlıq sistemləri və daxili yazışmalar kimi müxtəlif mənbələrdən daxil olan məlumatlar platformada inteqrasiya olunur və süni intellekt tərəfindən təhlil edilərək analitik nəticələrə çevrilir.

Şirkətin əsas iddiası yalnız məlumatların təhlili ilə məhdudlaşmır. “Rowspace” qurumların illər ərzində formalaşdırdığı investisiya məntiqini və qərarvermə yanaşmalarını kodlaşdıraraq rəqəmsal mühitə daşımağı hədəfləyir. Bu yanaşma sayəsində portfelin monitorinqi, kreditlərin optimallaşdırılması, risklərin qiymətləndirilməsi və çoxillik müqavilə analizləri kimi mürəkkəb maliyyə proseslərinin daha sürətli və sistemli şəkildə icrası mümkün olur.

Platforma müştərilərin mövcud texnoloji infrastrukturuna inteqrasiya edilə bilən formada hazırlanıb. Bu səbəbdən həssas maliyyə məlumatları şirkətin nəzarətində qalır. Süni intellektin təqdim etdiyi nəticələr isə “Excel” və “Microsoft Teams” kimi gündəlik istifadə olunan alətlər vasitəsilə çatdırılaraq maliyyə komandalarının mövcud iş axınına birbaşa inteqrasiya olunur.

Mayya Hüseynova