Bəzi tədbirlərdə iştirakçılar niyə mürgüləyir? - Diqqət probleminin səbəbləri

Ötən gün müzakirə mövzusu Azərbaycan Milli Elmlər Akademiyasında keçirilən tədbir zamanı bəzi alimlərin mürgülədiyini əks etdirən fotoşəkillər oldu. Sözügedən görüntü ictimaiyyət arasında müxtəlif reaksiyalara səbəb verdi və ümumi mənzərə tənqid olundu. Bəzi yanaşmalara görə, tədbirin gedişatı kifayət qədər maraqlı olmadığı üçün belə vəziyyət yaranıb, bəzləri isə mürgüləyən şəxsləri günahlandırdı.

Lakin məsələyə ümumi yanaşsaq, tədbirlər zamanı mürgüləyən və ya diqqətini telefona yönəldən iştirakçılara çox rast gəlirik.

Səbəb nədir? Bu kimi tədbirlər necə təşkil olunur ki, insanlar yatır? Yəni burda səhv nədir?      

“Facemark” biznes tədbirlərinin təşkili şirkətinin təsisçisi, biznes konsultant Rafiq Hunaltay Valyuta.az-a bildirib ki, tədbirlərin maraq doğurması məsələsindən danışırıqsa, burada şərti olaraq iki kateqoriyaya bölərək hər birinə ayrı yanaşmalıyıq:

"Özəl sektorun təşkil etdiyi tədbirlər və dövlət qurumlarının müəyyən prosedur və hesabat xarakterli tədbirləri. Dövlət tədbirlərinin bir çoxunda formatın illərdir dəyişməməsi iştirakçılar üçün yeni yanaşma təqdim etmir. Bu isə bəzi hallarda tədbirlərin daha monoton və yorucu qəbul edilməsinə səbəb olur. Özəl sektorun təşkil etdiyi tədbirlərdə isə proqram daha dinamik qurulur, interaktiv elementlərə və müəyyən dərəcədə əyləncə komponentlərinə yer verilir. Nəticədə belə tədbirlər daha canlı və cəlbedici görünür. Ümumilikdə, tədbirin diqqətdə saxlanılması proqramın axıcılığından birbaşa asılıdır. Çıxış edən şəxslərin kimliyi, mövzunun aktuallığı və gündəmlə uyğunluğu da mühüm rol oynayır. Lakin ümumi mənzərə göstərir ki, istər dövlət, istərsə də özəl sektor tərəfindən təşkil olunan tədbirlərdə interaktivlik səviyyəsi yetərli deyil. Elmi araşdırmalar da göstərir ki, insanlar təxminən 1-1,5 saatdan sonra eyni intensivlikdə və effektivlikdə dinləmə qabiliyyətini qoruyub saxlaya bilmirlər və passiv dinləmə mərhələsinə keçirlər. Bu mərhələdə diqqətin yayınması, mobil telefondan istifadə və digər paralel fəaliyyətlər artır. Bu baxımdan hər 1-1,5 saatdan bir qısa fasilələrin və ya interaktiv bölmələrin təşkili daha məqsədəuyğun hesab oluna bilər".

Mayya Hüseynova