Pulun gələcəyi necə olacaq? – Ekspertlərdən yeni proqnozlar

Qlobal iqtisadi sistemdə baş verən dəyişikliklər fonunda pul və maliyyə infrastrukturu da sürətlə transformasiya olunur.

Valyuta.az xəbər verir ki, "World Economic Forum" tərəfindən yayımlanan yeni təhlildə dörd maliyyə eksperti pulun gələcəyi ilə bağlı fikirlərini bölüşüb.

Ekspertlərin fikrincə, yaxın gələcəkdə pul tamamilə rəqəmsallaşa və ödənişlər mesaj göndərmək qədər asanlaşa bilər. Xüsusilə rəqəmsal cüzdanlar və blokçeyn əsaslı sistemlər maliyyə əməliyyatlarını daha sürətli, ucuz və şəffaf edəcək.

“Circle” şirkətinin baş icraçı direktoru Jeremy Allaire bildirib ki, gələcəkdə pulun istifadəsi “ünsiyyət qədər sadə” olacaq. Onun sözlərinə görə, insanlar sadəcə mobil telefon vasitəsilə dərhal ödəniş edə və vəsait qəbul edə biləcək.

Ekspertlər qeyd edir ki, rəqəmsal maliyyə sistemləri xüsusilə inkişaf etməkdə olan ölkələrdə maliyyə inklüzivliyini artıracaq. Denelle Dixon vurğulayıb ki, rəqəmsal aktivlər vasitəsilə insanlar banklara ehtiyac olmadan maliyyə əməliyyatları həyata keçirə biləcək.

Digər tərəfdən, qlobal maliyyə bazarlarında risklərin artması fonunda ənənəvi aktivlər də aktuallığını qoruyur. İnvestor Ray Dalio bildirib ki, geosiyasi gərginliklər səbəbindən qızıl və kriptovalyutalara maraq artmaqdadır.

“Standard Chartered” bankının baş icraçı direktoru Bill Winters isə qeyd edib ki, maliyyə sistemində əsas dəyişikliklərdən biri pulun tokenləşdirilməsi olacaq. Bu proses nəticəsində ödənişlər 24/7 rejimində, dərhal və izlənilə bilən şəkildə həyata keçiriləcək.

Hesab edilir ki, pulun gələcəyi rəqəmsallaşma, süni intellekt və qlobal iqtisadi dəyişikliklərin təsiri altında formalaşacaq.