Pulsuz hədiyyə verilən məhsul necə milyardlıq biznesə çevrildi? - “Wrigley”in hekayəsi - SƏHƏR OXUSU

Bu gün mağaza kassalarının yanında ən çox rast gəlinən məhsullardan biri saqqızdır. “Juicy Fruit”, “Extra” və digər Wrigley markalı saqqızlar dünyanın bir çox ölkəsində gündəlik istehlak olunan məhsullara çevrilib. Lakin məşhur “Wrigley” saqqız brendinin yaranma hekayəsi olduqca maraqlıdır.

Valyuta.az xəbər verir ki, William Wrigley Jr. əvvəlcə saqqız biznesi ilə məşğul olmayıb. Onun atası 1870-ci ildə Filadelfiyada Wrigley Manufacturing Company adlı şirkət quraraq sabun istehsal edirdi. Wrigley Jr. isə uşaqlıq illərində atasının sabunlarını satmaqla ticarətə başlayıb.

Daha sonra o, öz şirkətini yaradaraq sabun və qabartma tozu satmağa başlayıb. Satışları artırmaq üçün müştərilərə müxtəlif hədiyyələr verirdi. 1890-cı illərdə isə qabartma tozu alanlara pulsuz saqqız paylamağa başlayıb.

Lakin maraqlı məqam ondan ibarət idi ki, müştərilər satılan məhsullardan daha çox hədiyyə verilən saqqızları bəyənirdilər. Bu vəziyyəti görən Wrigley biznes istiqamətini dəyişərək saqqız istehsalına fokuslanıb. Qısa müddətdə “Juicy Fruit” və “Spearmint” kimi məşhur markalar bazara çıxarılıb.

Zaman keçdikcə şirkət qlobal bazarda böyük uğur qazanıb. Məsələn, İkinci Dünya müharibəsi dövründə saqqız ABŞ əsgərlərinə göndərilən paketlərin tərkibinə daxil edilirdi.

Bu gün isə Mars Wrigley şirkəti saqqızdan əlavə şokolad və digər qida məhsulları istehsal edir və dünya saqqız bazarının təxminən 35%-nə nəzarət edir.

Beləliklə, əvvəlcə sadəcə satış stimulu kimi paylanan saqqız sonradan dünyanın ən məşhur qida brendlərindən birinə çevrilib.

Sərvanə Rəmixanova