Britaniya banknotlarında Çörçillin yerini heyvanlar tuta bilər

Britaniya Bankı növbəti nəsil banknotların dizaynını dəyişmək qərarına gəlib. 

Valyuta.Az-ın verdiyi xəbərə görə, yeni seriyada tarixi şəxsiyyətlərin portretləri, o cümlədən Uinston Çörçillin təsviri əvəzinə Böyük Britaniyanın vəhşi təbiətini əks etdirən şəkillər yerləşdirilə bilər. Bu barədə “Bloomberg” agentliyi məlumat yayıb.

Məlumata görə, yeni əskinaslarda kirpi və porsuq kimi heyvanların təsvirlərinin yerləşdirilməsi planlaşdırılır.

Agentliyin qeyd etdiyi kimi, qərar təxminən 44 min nəfərin iştirak etdiyi ictimai məsləhətləşmələrin nəticələrinə əsasən qəbul edilib.

Tənzimləyici qurumun məlumatına görə, təklif olunan dizayn mövzuları arasında təbiət mövzusu ən çox dəstək qazanıb, tarixi şəxsiyyətlər isə yalnız üçüncü yeri tutub.

Britaniya Bankının baş kassiri Viktoriya Klelend bildirib ki, təbiət mövzusu banknotların təhlükəsizlik və autentifikasiya baxımından da yaxşı seçimdir.

Onun sözlərinə görə, bu yanaşma növbəti seriyada Böyük Britaniyanın zəngin və müxtəlif vəhşi təbiətini nümayiş etdirməyə imkan verəcək.

Yeni dizayn Britaniya banknotlarının təkamülündə növbəti mərhələ olacaq. Son illərdə tənzimləyici artıq kağız banknotları saxtalaşdırılması daha çətin olan polimer əakinaslarla əvəz edib.

Aydın