"PAŞA Bank"ın qeyri-faiz gəlirləri 34,4 milyon manat azalıb

"PAŞA Bank" 2026-cı ilin ilk üç ayını 48 milyon 287 min manat xalis mənfəətlə başa vurub.

Valyuta.az xəbər verir ki, bu ötən ilin 44 milyon 017 min manatı ilə müqayisədə 4 milyon 270 min manat və ya 9,7% artıb.

Bankın faiz gəlirləri hesabat dövründə 144 milyon 104 min manat təşkil edib. Ticarət və investisiya qiymətli kağızları üzrə faiz gəlirləri 1 milyon 108 min manat və ya 4,2% azalaraq 25 milyon 316 min manata düşüb.

Cari ilin yanvar-mart aylarında bankın faiz xərcləri 53 milyon 275 min manat olub. 2025-ci ilin eyni dövründə isə faiz xərcləri 39 milyon 248 min manat təşkil edib. Beləliklə, bu istiqamətdə 14 milyon 027 min manat və ya 35,7% artım qeydə alınıb. Artım əsasən depozitlər üzrə faiz xərcləri ilə bağlı olub. Bu üzrə faiz xərcləri 2025-ci ilin ilk rübündə 36 milyon 205 min manat olduğu halda, 2026-cı ilin ilk rübündə 49 milyon 102 min manata yüksəlib. Bu isə 12 milyon 897 min manat və ya 35,6% artımdır.

Bankın qeyri-faiz gəlirləri isə azalıb. 2025-ci ilin ilk üç ayında 91 milyon 482 min manat olan qeyri-faiz gəlirləri 2026-cı ilin eyni dövründə 57 milyon 062 min manata enib. Bu, 34 milyon 420 min manat və ya 37,6 faiz azalma deməkdir.

"PAŞA Bank"ın cəmi öhdəlikləri 2025-ci ilin ilk üç ayında 7 milyard 290 milyon 259 min manat olduğu halda, 2026-cı ilin eyni dövründə 8 milyard 088 milyon 327 min manata çatıb. 

Kredit təşkilatları və digər maliyyə institutları qarşısında öhdəliklər isə 2025-ci ilin ilk üç ayında 633 milyon 461 min manat olub. 2026-cı ilin eyni dövründə bu göstərici 208 milyon 960 min manat və ya 33% artaraq 842 milyon 421 min manata yüksəlib.