"Ötən il ticarətin maliyyələşdirilməsi üzrə 9,25 milyard dollarlıq layihə təsdiqlənib"

​"Beynəlxalq İslam Ticarət Maliyyəsi Korporasiyası (ITFC) 2008-ci ildə fəaliyyətə başladığı vaxtdan bəri ticarətin maliyyələşdirilməsi üzrə 96 milyard dollar məbləğində layihəni təsdiqləyib".

Valyuta.az xəbər verir ki, ITFC-nin Baş icraçı direktoru mühəndis Ədib Yusuf Əl Aama bu sözləri Bakıda keçirilən İslam İnkişaf Bankı (İSDB) Qrupunun Özəl Sektor Forumunun (PSF 2026) panel müzakirələrində deyib.

​O bildirib ki, korporasiya İslam Əməkdaşlıq Təşkilatına (İAT) üzv olan 57 ölkəyə dəstək göstərir: "Fəaliyyət həm ölkələr arası, həm də daxili ticarətin inkişafını hədəfləyir. Maliyyələşdirmə ilə yanaşı, potensialın gücləndirilməsi daxil olmaqla ticarətin şaxələndirilməsi istiqamətində də layihələr icra edilir".

Ədib Yusuf Əl Aamanın sözlərinə görə, korporasiyanın fəaliyyəti islam maliyyə prinsiplərinə əsaslanır və real iqtisadiyyatın inkişafına yönəlib: "Bu prinsiplərə risklərin bölüşdürülməsi, aktivlərlə təminat, etik investisiya və sosial həmrəylik daxildir".

​Baş icraçı direktor qeyd edib ki, təkcə 2025-ci ildə ticarətin maliyyələşdirilməsi üzrə 9.25 milyard dollar həcmində layihə təsdiq edilib: "Bunun 4.8 milyard dolları İAT daxili ticarətin maliyyələşdirilməsinə yönəldilib. Ayrılan vəsaitlər daha çox ehtiyacı olan az inkişaf etmiş ölkələrə istiqamətləndirilir".

​Qurum rəhbəri həmçinin xarici maliyyə resurslarının cəlb edilməsi (mobilizasiya) imkanlarına da toxunub.

Bildirib ki, ITFC tərəfindən yatırılan hər 1 dollar qarşılığında kənar mənbələrdən 2 dollar vəsait cəlb etmək mümkün olub. Beləliklə, indiyədək partnyor maliyyə institutları ilə tərəfdaşlıq çərçivəsində ümumilikdə 60 milyard dollara yaxın vəsait səfərbər edilib.

Sərvanə Rəmixanova