Məhəmməd Əl Cassir: "İSDB ticarətin maliyyələşdirilməsinə 20 milyard dollar vəsait ayırıb"

​"Beynəlxalq İslam Ticarət Maliyyəsi Korporasiyası (ITFC) fəaliyyətə başladığı vaxtdan bəri ticarətin maliyyələşdirilməsinə 20 milyard dollar vəsait ayırıb".

​Valyuta.az xəbər verir ki, İslam İnkişaf Bankı (İSDB) Qrupunun sədri Dr. Məhəmməd Əl Cassir bu sözləri Bakıda keçirilən İSDB Qrupunun Özəl Sektor Forumunun (PSF 2026) açılış mərasimində deyib.

​Məhəmməd Əl Cassirin sözlərinə görə, bankın fərqli qurumları üzrə indiyə qədər böyük rəqəmlər əldə olunub: "İnvestisiyaların və İxrac Kreditlərinin Sığortası üzrə İslam Korporasiyası (ICIEC) 1994-cü ildən bəri 51 ölkədə 159 milyard dollardan çox məbləği sığortalayıb. Təkcə 2025-ci ildə 6000-ə yaxın KOB-un maliyyəyə çıxışı dəstəklənib və 294 mindən çox iş yeri qorunub.

Sədr həmçinin qeyd edib ki, özəl sektorun inkişafı üzrə İslam Korporasiyası (ICD) 41 ölkədə 7.1 milyard dolları ötən 450-dən çox layihəni maliyyələşdirib. Bundan başqa, "THIQAH" Biznes Forumu çərçivəsində 400-dən çox tədbir təşkil edilib və 1500-dən çox "B2B" və "B2G" görüşlər keçirilib".

​Sonda Məhəmməd Əl Cassir vurğulayıb ki, bu forum sadəcə illik tədbir deyil, dialoqun real fəaliyyətə, ideyaların isə investisiyaya çevrildiyi canlı bir platformadır.

Sərvanə Rəmixanova