Mark Kyuban deyir ki, tənəzzül dövründə bu 7 addımı atmalısınız

Milyarder Mark Kyuban "Dallas Mavericks" basketbol klubunun sahibi və "ABC" telekanalında yayımlanan "Shark Tank" verilişinin uzunmüddətli iştirakçısı kimi tanınır. O, eyni zamanda ardıcıl sahibkar və sosial mediada fəal mövqeyi ilə seçilən ictimai fiqurdur. Onun təkcə "X" (əvvəlki "Twitter") və "Bluesky" platformalarında ümumilikdə 10 milyona yaxın izləyicisi var.

Kyuban iqtisadi geriləmə dövrünü daha az itki ilə keçirmək üçün yeddi tövsiyə səsləndirib:

Kyubanın fikrincə, ilk növbədə borcların yenidən maliyyələşdirilməsi vacibdir. Yüksək faizli kredit kartı borclarını daha aşağı faizli fərdi kredit və ya 0 faizli balans köçürmə kartı ilə əvəz etməklə xərcləri azaltmaq mümkündür. Lakin federal tələbə kreditləri üzrə gəlirə əsaslanan ödəmə planları və uzunmüddətli silinmə imkanları kimi üstünlüklər nəzərə alınaraq qərar verilməlidir.

İkinci vacib addım qənaətin artırılmasıdır. Kyuban qeyd edir ki, nağd vəsaiti olan şəxslərin böhran dövründə imkanları daha geniş olur. Əksər mütəxəssislər üç-altı aylıq yaşayış xərclərinə bərabər ehtiyat fondu tövsiyə etsələr də, bəzi ekspertlər bu müddətin səkkiz aya qədər artırılmasını məqsədəuyğun sayırlar.

O, həmçinin iqtisadi yavaşlamanın iş yerinə mümkün təsirlərini əvvəlcədən qiymətləndirməyi tövsiyə edir. İşəgötürənin ixtisar və ya maaş azaldılması ehtimalını nəzərə almaq, yeni bacarıqlar qazanmaq və peşəkar əlaqələri gücləndirmək riskləri azalda bilər.

Kyuban qənaətcil həyat tərzinin əhəmiyyətini də vurğulayır. O, lazımsız abunəlikləri dayandırmağı, evdə daha sərfəli yeməklər hazırlamağı, pulsuz əyləncə imkanlarından yararlanmağı, mümkün olduqda ikinci əl məhsullar almağı və müxtəlif endirimlərdən istifadə etməyi tövsiyə edir. Onun sözlərinə görə, aşağı xərclər daha az maliyyə stressi deməkdir.

Bundan əlavə, o, iqtisadi proqnozlara kor-koranə inanmağın doğru olmadığını bildirir. Kyuban qeyd edir ki, qlobal iqtisadiyyatda hadisələrin hansı istiqamətdə inkişaf edəcəyini əvvəlcədən dəqiq proqnozlaşdırmaq mümkün deyil və müxtəlif amillər gözlənilməz nəticələrə səbəb ola bilər.

Nəhayət, Kyuban iş yerində peşəkarlığın artırılmasının vacibliyini vurğulayır. Özünü obyektiv qiymətləndirmək, güclü tərəfləri müəyyənləşdirmək və zəif bacarıqları inkişaf etdirmək mühüm əhəmiyyət daşıyır. Müsbət münasibət, konstruktiv tənqidə açıqlıq, güclü ünsiyyət bacarığı, çeviklik, problem həll etmə qabiliyyəti və etibarlılıq əməkdaşın dəyərini artıran əsas xüsusiyyətlər kimi göstərilir.

Kyuban hesab edir ki, gələcəkdə nə baş verəcəyini dəqiq bilmək mümkün olmasa da, indidən maliyyə dayanıqlığını gücləndirmək və peşəkar bacarıqları inkişaf etdirmək istənilən ssenaridə faydalı olacaq.

Tənzilə Ağabalayeva