“YouTube” ABŞ iqtisadiyyatına 55 milyard dollar qazandırıb

”YouTube” 2025-ci il iyunun 10-da yaradıcılıq sənayesinin iqtisadi əhəmiyyətini gündəmə gətirən yeni hesabat yayıb.

Valyuta.az xəbər verir ki, "Oxford Economics" təşkilatının araşdırmasına əsasən, platformanın yaradıcılıq ekosistemi 2024-cü ildə ABŞ ÜDM-nə 55 milyard dollardan çox töhfə verib və 490 mindən artıq tam ştatlı iş yerinin formalaşmasına səbəb olub.

“YouTube”un "yaradıcılıq ekosistemi" dedikdə yalnız məzmun yaradıcıları nəzərdə tutulmur. Buraya həmçinin onlarla birbaşa və ya dolayı şəkildə işləyən montajçılar, köməkçilər, PR mütəxəssisləri, eləcə də "Patreon", "Spotter", "Linktree" kimi yaradıcı yönümlü şirkətlərin əməkdaşları daxildir.

Bu rəqəmlər investisiya tempinin əvvəlki illərə nisbətən azaldığı bir dövrdə qeydə alınsa da, artım müşahidə olunub. Belə ki, 2022-ci ildə oxşar hesabatda 390 min iş yeri və 35 milyard dollarlıq iqtisadi töhfə qeyd olunmuşdu. Son iki ildə isə bu göstəricilər müvafiq olaraq 100 min və 20 milyard dollar artım göstərib.

Qeyd olunur ki, “YouTube”un bu qədər böyük təsir gücünə malik olmasının əsas səbəblərindən biri onun yaradıcılar üçün daha sabit və gəlirli imkanlar təqdim etməsidir. Platformanın Tərəfdaşlıq Proqramına qoşulan istifadəçilər reklam gəlirlərinin 55 faizini əldə edə bilirlər. Hətta orta səviyyəli yaradıcılar üçün bu gəlir hər ay minlərlə dollar təşkil edə bilər. “TikTok” və

“YouTube” Shorts kimi platformalar da bu istiqamətdə cəhdlər etsə də, qısa formalı məzmunlar üçün reklam gəlirlərinin effektiv bölüşdürülməsi hələ tam təmin olunmayıb.

Sərvanə Rəmixanova