Balkan paytaxtı 2026-cı ilin ən yaxşı büdcəli tətil məkanı seçildi

Səyahət xərclərinin 2026-cı ildə artacağına dair proqnozlar fonunda Bosniya və Herseqovinanın paytaxtı Sarayevo qısa müddətli şəhər istirahəti (city-break) üçün ən yaxşı istiqamət kimi tanınıb.

Valyuta.az xəbər verir ki, bu qənaətə Avropanın müxtəlif şəhərlərində yaşayış, qida və digər turizm xidmətlərinin qiymətlərini təhlil edən səyahət və əyləncə mövzulu “Time Out” nəşrinin jurnalistləri gəlib.

Niyə Sarayevo 2026-cı ildə Avropada city-break üçün ən yaxşı şəhərdir?

Araşdırmanın müəlliflərinin qiymətləndirmələrinə görə, Sarayevoda bir bokal pivə və ya şərab orta hesabla cəmi 2,30 avroya başa gəlir. Şəhərdə “Airbnb” platformasında bir gecəlik yaşayışı isə orta hesabla 40 avroya tapmaq mümkündür.

Yaşıllıqlarla örtülü Dinar Alplarının fonunda yerləşən və Milatska çayı ilə iki yerə bölünən Bosniya və Herseqovinanın paytaxtı turistlərə unudulmaz, autentik istirahət təklif edir.

Təbiətdən zövq aldıqdan sonra şəhərin qapalı ərzaq bazarı olan “Gradska tržnica Markale”yə baş çəkmək, burada burek (ənənəvi, şirin olmayan yarpaqlı xəmir məmulatı) dadmaq, daha sonra isə hər biri cəmi 2 avrodan başlayan pivə və ya şərab sifariş etmək mümkündür. Eyni zamanda “Caffe Divan”da əsl Bosniya qəhvəsindən dadmaq olar.

Mütəxəssislər vurğulayırlar ki, Sarayevoda təkcə yemək, içki və görməli yerlərin qiymətləri ucuz deyil, həm də bir çox məşhur turizm məkanlarından fərqli olaraq, turistlərdən hər addımda əlavə ödəniş tələb olunmur.

“Time Out” bələdçilərinin redaktoru Ella Doyl isə şəhərə avqust ayında səfər etməyi tövsiyə edir. Bu dövrdə Sarayevo daha günəşli olur və eyni zamanda Cənub-Şərqi Avropanın ən nüfuzlu tədbirlərindən biri sayılan Sarayevo Kino Festivalı keçirilir.

2026-cı il üçün Avropada ən yaxşı 5 büdcə şəhəri

“Time Out” müəllifləri Sarayevodan başqa, qısa və münasib büdcəli istirahət üçün daha dörd şəhəri də seçiblər.

1. Sarayevo, Bosniya və Herseqovina
2. Tirana, Albaniya
3. Hall, Böyük Britaniya
4. Mişkolts, Macarıstan
5. Zaqreb, Xorvatiya

Paşa Məmmədli