Səudiyyədə 10 milyard dollarlıq "Trump" qolf-klubu və otel tikiləcək

Səudiyyə Ərəbistanının “Dar Global” inkişaf şirkəti “Trump” brendi altında iki lüks layihənin icrasına başladığını elan edib. 

Valyuta.az xəbər verir ki, “Reuters” agentliyinin məlumatına görə, Ər-Riyad və Ciddə şəhərlərində ümumi dəyəri 10 milyard dollar olan qolf-klubu və otel inşa olunacaq.

“Trump International Golf Club” qapalı kompleks formatında reallaşdırılacaq. Layihəyə qolf meydançası, lüks otel və premium sinif yaşayış kompleksləri daxil olacaq. Obyektin ümumi sahəsi 2,6 milyon kvadratmetr təşkil edəcək. Ciddə şəhərində isə ofis və yaşayış sahələrini əhatə edən çoxfunksiyalı “Trump Plaza” kompleksinin tikintisi planlaşdırılır.

“Dar Global”ın baş icraçı direktoru Ziyad əl-Çaarın sözlərinə görə, bu layihələrin həyata keçirilməsi Səudiyyə Ərəbistanının iqtisadiyyatın şaxələndirilməsini, neftdən asılılığın azaldılmasını və birbaşa xarici investisiyaların cəlb olunmasını hədəfləyən “Vision-2030” inkişaf strategiyasına uyğundur.

Paşa Məmmədli