"iPad" satışlarında "partlayış" qeydə alındı

2025-ci ilin dördüncü rübündə "iPad" satışları illik ifadədə 16,5 faiz artaraq 19,6 milyon qurğuya çatıb. 

Valyuta.az xəbər verir ki, bu barədə “Omdia” analitik şirkətinin yeni hesabatında deyilir.

Bu göstərici “Apple”a planşetlərin qlobal bazarında mövqelərini möhkəmləndirməyə imkan verib. Yüksək nəticələrə “iPad”in 11-ci nəsli və “M5” çipli “iPad Pro” modellərinə olan sabit tələbat səbəb olub. 

Tələbatın bərpası bütövlükdə planşet bazarının böyüməsinə təkan verib. 2025-ci ildə qlobal tədarüklər əvvəlki illə müqayisədə 9,8 faiz artaraq 162 milyon qurğuya çatıb. Bayram rübündə tədarüklər 44 milyon qurğu təşkil edib və bu da illik ifadədə 9,8 faiz artım deməkdir. Bu göstərici 2020-ci ildə müşahidə olunan kəskin tələbat artımından bəri ən yüksək səviyyə olub.

Dördüncü rübün nəticələri “Apple”a bazar payını 44,9 faizə qədər artırmağa və digər istehsalçıları xeyli geridə qoymağa imkan verib.

Analitiklərin fikrincə, yaxın illərdə planşet istehsalçıları qurğuları vahid ekosistemin bir hissəsi kimi daha fəal təşviq edəcək, süni intellekt əsaslı funksiyalara və kross-platforma inteqrasiyasına daha çox diqqət yetirəcəklər.

Paşa Məmmədli