“Bir nəfərin kredit borcuna görə, bankın ailə üzvlərinə zəng vurması qanunsuzdur”

Şəxsin qardaşı bankdan kredit götürüb və hazırda həmin borcun ödənilməsində çətinlik yaşayır. Bank isə zamin olmayan valideynlərə və digər ailə üzvlərinə gündə bir neçə dəfə müxtəlif nömrələrdən zəng edir. Bu, ailə üzvlərində psixoloji gərginlik yaradır.

Zaminlik və hüquqi öhdəlik olmadan bankın ailə üzvlərinə davamlı zəng etməsi nə dərəcədə qanunidir?

Azərbaycan Vəkillər Kollegiyasının üzvü Cavanşir Qasımzadə Valyuta.az-a bildirib ki, bankların bu hərəkəti tamamilə qanunsuzdur:

"Borclu kredit müqaviləsinə əsasən şəxsən məsuliyyət daşıyır. Zamin isə yalnız zaminlik müqaviləsi üzrə öhdəliklərinə görə məsuliyyət daşıyır. Zaminlik müqaviləsinin tərəfi olmayan hər hansı bir qohuma zəng edilməsi və ya ona istənilən formada təzyiq göstərilməsi, hətta sadəcə zəng edilməsi belə, birbaşa olaraq həm Konstitusiyanın, həm də “Fərdi məlumatlar haqqında” qanunun və İnzibati Xətalar Məcəlləsinin tələblərinin pozulması deməkdir. Konstitusiyada şəxsi həyatın toxunulmazlığı açıq şəkildə təsbit olunub. “Fərdi məlumatlar haqqında” qanuna görə, şəxsin mobil nömrəsi fərdi məlumat hesab olunur və bu məlumatlardan sui-istifadəyə yol verilə bilməz. Bank bu məlumatlardan yalnız qanuni əsaslarla və müvafiq razılıq olduqda istifadə edə bilər. Əks halda, bu, inzibati məsuliyyət doğura bilər və bank cərimələnə bilər".

"Əgər şəxs bu cür qanunsuz zənglərlə və təzyiqlərlə davamlı şəkildə üzləşirsə, ilk növbədə bankın özünə müraciət edərək etirazını bildirməli və həmin nömrənin bankın məlumat bazasından silinməsini tələb etməlidir. Əgər bu baş verməzsə, Mərkəzi Bankın qaynar xəttinə müraciət olunaraq məlumatların silinməsi və bankla bağlı tədbir görülməsi tələb oluna bilər. Bundan əlavə, şəxs mənəvi zərərə görə və bankın öhdəliklərinin müəyyən olunması məqsədilə məhkəməyə də müraciət edə bilər", - deyə C.Qasımzadə əlavə edib. 

Mayya Hüseynova