Epşteyn ona 100 milyon dollar vəsiyyət edib

Ceffri Epşteynin arxivinin dərc olunmasından sonra məlum olub ki, onun əsas varisi Belaruslu stomatoloq Karina Şulyak olub. Epşteyn ölümündən iki gün əvvəl tərtib etdiyi 32 səhifəlik trast müqaviləsində ona 100 milyon dollar, 48 almaz, almaz üzüyü və daşınmaz əmlaklarını – Paris və Nyu-Yorkdakı mənzillərini, Nyu-Meksikodakı rançosunu və Karib dənizindəki şəxsi adası Litl-Sent-Ceymsi miras qoymuşdu.

Epşteynin sərvəti ümumilikdə 40 benefisiar arasında bölünməli idi. Onlar arasında qardaşı Mark Epşteyn, Gileyen Maksuell və şəxsi pilotu Lerri Viskoski də var idi. Müqaviləyə görə, Gileyen Maksuell və Mark Epşteyn hər biri 10 milyon dollar, mühasib Riçard Kan 25 milyon, vəkil Darren İndayk isə 50 milyon dollar almalı idi.
Karina Şulyak Belarusdan olub, Minskdə məktəb oxuyub, sonra Belarus Dövlət Tibb Universitetinə daxil olub və 2009-cu ildə “Work and Travel” proqramı ilə ABŞ-a gəlib. Epşteyn onun Kolumbiya Universitetində təhsil haqqını ödəyib, iş icazəsi və anasının ABŞ-da müalicəsini maliyyələşdirib. Mənbələrə görə, Karina Epşteynin yanında pul üçün deyil, ona aşiq olduğu üçün qalmışdı.

Qurbanlara ödənilən kompensasiyalar səbəbindən Karina hələ miras ala bilməyib. Vəsiyyətin icraçıları Riçard Kan və Darren İndayk bildiriblər ki, qurbanların tələbləri tam ödənilməyənə qədər heç bir benefisiar “bir sent belə” almayacaq. Ehtimal olunur ki, Karina hazırda Nyu-Yorkda yaşayır.