"Instagram" yaxın dostlar üçün yeni tətbiqini sınaqdan keçirir – “Instants” nədir?

"Instagram" İtaliyada “Instants” adlı yeni tətbiqini test etməyə başlayıb.

Valyuta.az xəbər verir ki, "Meta"ya məxsus platformanın sınaqdan keçirdiyi bu yenilik istifadəçilərin yalnız yaxın dostları ilə ani və itən fotolar paylaşmasına fokuslanır. İlkin mərhələdə test yalnız İtaliya bazarı ilə məhdudlaşdırılıb.

Digər ölkələrdə istifadəyə veriləcəyi tarix isə açıqlanmayıb.

Yeni tətbiq qarşılıqlı paylaşım prinsipi ilə işləyir. Belə ki, istifadəçi başqalarının paylaşdığı məzmunu görmək üçün əvvəlcə özü foto paylaşmalıdır. Yüklənən fotolar isə müəyyən vaxtdan sonra avtomatik silinir. Bu model ənənəvi, hamıya açıq və qalıcı paylaşımların üstünlük təşkil etdiyi klassik Instagram axınından fərqli təcrübə təqdim edir.

Məqsəd daha kiçik sosial çevrədə, izlənmə və bəyənmə təzyiqindən uzaq, daha spontan paylaşımları təşviq etməkdir.

Yeni tətbiqin formatı "Snapchat"ı xatırlatsa da, əslində "Instagram"ın mövcud “Yaxın Dostlar” funksiyasının ayrıca məhsula çevrilmiş versiyası kimi qiymətləndirilir.

Hələlik “Instants”ın daimi məhsula çevrilib-çevrilməyəcəyi məlum deyil. Bununla belə, bu addım "Meta"nın xüsusilə gənc istifadəçilərin daha qapalı, şəxsi və müvəqqəti paylaşım vərdişlərinə cavab axtardığını göstərir.

Sərvanə Rəmixanova