Bankda işləyirdi, itlər üçün tort bişirərək biznes qurdu

İllər əvvəl dünyanı ağuşuna alan koronavirus pandemiyası milyonlarla insanın həyatını dəyişdi. Bəziləri işini itirdi, bəziləri isə yeni biznes qurmaq üçün fürsət tapdı.

Valyuta.az xəbər verir ki, Böyük Britaniyada yaşayan Semmi Coys isə biznesini yaradanlardan biri oldu. O, evdə təcriddə qaldığı günlərdə ağlına gələn ideya sayəsində ev heyvanları üçün tort hazırlayan biznes qurub.

Pandemiya dövründə evdə sıxılan gənc qadın təsadüfən rast gəldiyi ideyanı gəlirli biznesə çevirib. Belə ki, Semmi Coys itlər və pişiklər üçün xüsusi tortlar hazırlayan şirkət yaradıb.

Bank əməkdaşı kimi çalışan Semmi biznesə koronavirus səbəbindən təcriddə qaldığı vaxt başlayıb.

Onun sözlərinə görə, internetdə itlər üçün hazırlanmış tortlarla bağlı səhifə görməsi yeni biznes ideyasının yaranmasına səbəb olub.

"Mən əvvəllər itlər üçün tortların mövcud olduğunu belə bilmirdim. Araşdırdıqdan sonra bu sahədə çox az təklif olduğunu gördüm və düşündüm ki, bunu özüm edə bilərəm",- deyə sahibkar bildirib.

O, əvvəlcə dostlarının itləri üçün kiçik tortlar hazırlayıb və onları pulsuz təqdim edib. Məhsullar ev heyvanları tərəfindən bəyənildikdən sonra o, "Pawfect Cakes" adlı biznesini qurub.

Sahibkarın hazırladığı məhsullar arasında itlər üçün keks, ad günü tortları, hədiyyə qutuları, papaqlar və fərdiləşdirilmiş aksesuarlar yer alır. Daha sonra o, pişiklər üçün də xüsusi məhsullar hazırlamağa başlayıb. Pişiklər üçün hazırlanan tortların əsas inqrediyenti isə tuna balığıdır.

Semmi bildirir ki, müştərilərin əksəriyyəti ev heyvanlarının ad günlərini qeyd etmək üçün sifariş verir. Pandemiya dövründə insanların evdə daha çox vaxt keçirməsi və ev heyvanlarına diqqətin artması biznesin sürətlə böyüməsinə kömək edib.