Redaktor
"İnsanlar çox vaxt ehtiyacı olanı yox, qarşısına çıxan məhsulu alır" - Marketoloq
Bir zamanlar alış qərarlarımız əsasən ehtiyaclarımız əsasında formalaşırdı. Bu gün isə həmin qərarlar bəzən bir “story”, bir “reels” və ya tanımadığımız birinin tövsiyəsi ilə verilir. Sosial media artıq sadəcə ünsiyyət platforması deyil, insanların nəyi, nə vaxt və niyə alacağını müəyyən edən görünməz iqtisadi qüvvəyə çevrilib.
Bəs sosial media bu gün istehlak davranışlarına həqiqətən təsir edirmi?
Marketinq üzrə mütəxəssis Samir Mehdiyev Valyuta.az-a bildirib ki, sosial media bu gün istehlak davranışlarının formalaşmasında əsas rol oynayan kanallardan birinə çevrilib:
“Brendlər artıq yalnız məhsulun funksional üstünlüklərini deyil, onun arxasında dayanan hekayəni, dəyərləri və həyat tərzini təqdim edirlər. İstifadəçilər sosial mediada gördükləri məzmun vasitəsilə məhsulu real insanların gündəlik həyatında müşahidə edir və bu da alış qərarına olan etibarı artırır. Sosial platformalar eyni zamanda rəy və tövsiyə mərkəzinə çevrilib. İstifadəçi rəyləri, influencer paylaşımları və istifadəçi tərəfindən yaradılan məzmun klassik reklam mesajlarından daha təsirli olur. İnsanlar məhsulu almadan öncə başqalarının təcrübəsinə baxır və bu sosial təsdiq alış prosesini sürətləndirir”.
“Alqoritmlərin verdiyi fərdiləşdirilmiş məzmun isə istehlakçının ehtiyaclarını birbaşa hədəfləyir. İstifadəçi çox zaman ehtiyacını özü axtarmır – qarşısına çıxarılan məhsul onun marağını oyadır və impulsiv alış davranışı yaranır. Bu təsir xüsusilə mobil istifadə və sosial şəbəkələrdə daha aydın görünür. Bundan əlavə, sosial mediada yaradılan məhdud zamanlı kampaniyalar və kütləvi maraq effekti istifadəçilərdə qərarvermə təzyiqi yaradır. “Hamı alır” və “qaçırma” kimi mesajlar istehlakçını daha tez hərəkət etməyə vadar edir. Nəticə etibarilə sosial media istehlakçını daha məlumatlı, lakin eyni zamanda daha emosional qərar verən bir mövqeyə gətirir. Müasir istehlakçı üçün məhsuldan çox onun yaratdığı təcrübə və verdiyi hiss ön plana çıxır” – deyə S. Mehdiyev qeyd edib.
Tənzilə Ağabalayeva
