İlon Mask "Tesla" və "SpaceX" üçün yeni planını açıqladı

İlon Mask rəhbərlik etdiyi "Tesla" və "SpaceX" üçün çip istehsalı sahəsində yeni planlarını açıqlayıb.

Valyuta.az xəbər verir ki, Mask ABŞ-ın Texas ştatının Ostin şəhərində keçirilən tədbirdə çıxışı zamanı “Terafab” adlandırılan yeni istehsal müəssisəsinin "Tesla"nın Ostində yerləşən “Gigafactory” zavodunun yaxınlığında tikiləcəyini bildirib.

Onun sözlərinə görə, layihənin əsas məqsədi süni intellekt və robot texnologiyaları üçün tələb olunan çiplərin çatışmazlığını aradan qaldırmaqdır. Mask qeyd edib ki, mövcud yarımkeçirici istehsalçıları bu tələbi kifayət qədər sürətlə qarşılamır.

Planlara əsasən, yeni zavod ildə Yer üzündə 100-200 giqavat hesablama gücünü dəstəkləyən çiplər istehsal etməyi, eyni zamanda kosmos üçün 1 teravat gücündə texnologiya hazırlamağı hədəfləyir. Layihənin həyata keçirilmə vaxtı ilə bağlı isə konkret tarix açıqlanmayıb.

Qeyd edək ki, Maskın yarımkeçirici istehsalı sahəsində birbaşa təcrübəsi olmasa da, o, daha əvvəl də iddialı texnoloji layihələri ilə diqqət çəkib.

Sərvanə Rəmixanova