İlk “Milli Kosmik İnkubasiya” layihəsinin “Demo Day” tədbirində 7 startap təqdim olunub

Azərbaycan Kosmik Agentliyinin (“Azərkosmos”) ilk “Milli Kosmik İnkubasiya” layihəsi çərçivəsində Azərbaycan İnnovasiya Mərkəzində keçirilən “Demo Day” tədbirində 7 komanda hazırladığı startap ideyalarını təqdim edib.

Təqdim olunan layihələr daşınmaz əmlakın CİS vasitəsilə dəyərləndirilməsi, peyk məlumatları əsasında iaşə obyektlərinin yerləşmə təhlili, ətraf mühitin monitorinqi, analitik hesabatlılıq, balıqçılıq üçün potensial ərazilərin müəyyənləşdirilməsi, torpaq münbitliyi və suvarma sistemlərinin izlənməsi, eləcə də təbii fəlakət risklərinin qiymətləndirilməsi kimi istiqamətləri əhatə edib.

“Azərkosmos”un həyata keçirdiyi layihə kosmik texnologiyalar və Yerin müşahidəsi sahəsində innovativ həllərin inkişafını dəstəkləmək məqsədi daşıyır. “Demo Day” mərhələsindən sonra komandalar mentor dəstəyi ilə məhsulların hazırlanması və real mühitdə sınaqdan keçirilməsi mərhələsinə keçəcəklər.