Effektiv şəbəkələşmə: Bu 10 səhvdən uzaq durun

Müasir əmək bazarında peşəkar əlaqələr (networking) yeni iş tapmağın ən effektiv yollarından birinə çevrilib.

Bir çox şirkət vakansiyaları doldurarkən mövcud əməkdaşlarının tövsiyələrinə üstünlük verir. Bu yanaşma həm işəgötürən, həm də namizəd üçün vaxt və resurslara qənaət edir.

Lakin güclü peşəkar əlaqələr qurmaq təkcə insanlarla tanış olmaqdan ibarət deyil. Bu prosesdə buraxılan bəzi səhvlər imkanların əldən çıxmasına səbəb ola bilər.

Aşağıda effektiv şəbəkələşmə zamanı ən çox rast gəlinən 10 səhv və onlardan yayınmağın yolları təqdim olunur:

1. Şəxsi görüşlərdən yayınmayın

Onlayn platformalar əlaqə yaratmağı asanlaşdırsa da, üz-üzə görüşlərin əvəzini vermir. Konfranslar, seminarlar, karyera sərgiləri və peşəkar tədbirlər yeni insanlarla tanış olmaq üçün əla imkan yaradır.

Şəxsi ünsiyyət etibar formalaşdırır və işə olan marağınızı daha aydın nümayiş etdirir.

2. Şəbəkələşmədən dərhal nəticə gözləməyin

Bir çox insan yeni tanışlıqdan dərhal iş təklifi gözləyir. Halbuki peşəkar əlaqələr uzunmüddətli münasibətlər üzərində qurulur.

İnsanları tanımağa vaxt ayırın, onların fəaliyyət sahəsini öyrənin və qarşılıqlı faydalı münasibətlər yaratmağa çalışın.

3. Şəxsi brendinizi formalaşdırın

İnsanlar sizi yalnız CV-nizlə deyil, peşəkar nüfuzunuzla da tanıyırlar. Bacarıqlarınızı nümayiş etdirin, biliklərinizi paylaşın və sahənizdə aktiv olun.

Güclü şəxsi brend sizi digər namizədlərdən fərqləndirən ən vacib amillərdən biridir.

4. Yeni insanlarla tanış olmaqdan çəkinməyin

Şəbəkələşmənin əsas məqsədi yeni əlaqələr qurmaqdır. Əgər daim eyni insanlarla ünsiyyətdə olursunuzsa, yeni imkanlardan xəbərsiz qala bilərsiniz.

Müxtəlif tədbirlərdə iştirak edin, fərqli sahələrdən olan insanlarla tanış olun və əlaqə dairənizi genişləndirin.

5. Peşəkar davranış nümayiş etdirin

İlk təəssürat çox önəmlidir. Ünsiyyət zamanı nəzakətli, məsuliyyətli və peşəkar davranmaq etibar qazanmağa kömək edir.

"LinkedIn" kimi peşəkar platformalarda aktiv olmaq, nailiyyətlərinizi paylaşmaq və profilinizi mütəmadi yeniləmək də şəxsi imicinizi gücləndirir.

6. Nə istədiyinizi dəqiq ifadə edin

Əlaqələrinizdən kömək istəyərkən konkret olun. Hansı vəzifə ilə maraqlandığınızı, hansı bacarıqlara malik olduğunuzu və hansı sahədə işləmək istədiyinizi aydın şəkildə izah edin.

Bu, qarşı tərəfin sizə uyğun imkanları daha rahat müəyyən etməsinə kömək edəcək.

7. Əlaqələri davamlı saxlayın

Şəbəkələşmə yalnız tanış olmaqdan ibarət deyil. Mövcud əlaqələri qorumaq da eyni dərəcədə vacibdir.

Müəyyən vaxtlarda əlaqə saxlayın, bayram münasibətilə təbrik edin və ya peşəkar yeniliklərinizi paylaşın. Əlaqələrin yalnız ehtiyac yarananda xatırlanması düzgün yanaşma hesab olunmur.

8. Səbirli olun

Etibarlı peşəkar münasibətlər qısa müddətdə formalaşmır. Bəzən aylar, hətta illər sonra qurduğunuz əlaqələr sizə yeni imkanlar qazandıra bilər.

Səbirli olmaq və münasibətləri təbii şəkildə inkişaf etdirmək uğurlu şəbəkələşmənin vacib şərtlərindəndir.

9. Minnətdarlığınızı bildirin

Kiçik bir məsləhət, tanışlıq və ya tövsiyə belə təşəkkürə layiqdir. Vaxt ayırıb sizə kömək edən insanlara minnətdarlığınızı bildirmək peşəkar münasibətləri daha da möhkəmləndirir.

Sadə bir təşəkkür mesajı belə müsbət təəssürat yarada bilər.

10. Xarici görünüşünüzə diqqət yetirin

İlk təəssüratın formalaşmasında geyim və ümumi görünüş mühüm rol oynayır. Səliqəli və peşəkar geyim tərzi özünəinamınızı artırmaqla yanaşı, qarşı tərəfdə də müsbət fikir formalaşdırır.

Mühitə uyğun geyinmək və baxımlı görünmək peşəkar şəbəkələşmənin ayrılmaz hissəsidir.

Tənzilə Ağabalayeva