İnvestorların bilməli olduğu Uorren Baffetin 3 qızıl qaydası

Dünyanın ən uğurlu investorlarından biri hesab edilən Uorren Baffet təkcə qazandığı milyardlarla deyil, həm də investisiya sahəsində formalaşdırdığı fəlsəfə ilə tanınır.

İlk səhmini cəmi 11 yaşında alan Baffet onilliklər ərzində topladığı təcrübəni investorlarla bölüşərək maliyyə dünyasında ən çox sitat gətirilən şəxslərdən birinə çevrilib.

"Omahanın kahini" kimi tanınan Baffetin fikirləri bu gün də həm peşəkar, həm də yeni başlayan investorlar üçün dəyərli yol göstəricisi hesab olunur.

Onun ən məşhur tövsiyələrindən üçü xüsusilə diqqət çəkir:

Başqaları tamahkar olanda ehtiyatlı, qorxanda isə cəsarətli olun

Baffetin ən məşhur sitatlarından biri ilk dəfə 1986-cı ildə "Berkshire Hathaway"in səhmdarlara ünvanlanan məktubunda yer alıb.

"Biz sadəcə başqaları tamahkar olanda ehtiyatlı olmağa, başqaları qorxanda isə cəsarətli olmağa çalışırıq."

Bu fikir bazarlarda emosiyaların necə işlədiyini izah edir. İnvestorlar həddindən artıq nikbin olduqda səhmlərin qiymətləri real dəyərini üstələyə bilər. Əksinə, bazarda qorxu hökm sürdükdə güclü şirkətlərin səhmlərini daha münasib qiymətə almaq imkanı yaranır.

Baffetin sözlərinə görə, uğurlu investor kütlənin arxasınca kor-koranə getməməli, qərarlarını emosiyalarla deyil, məntiqlə verməlidir.

Keyfiyyətli şirkətə üstünlük verin

Baffetin digər məşhur tövsiyəsi belədir:

"Əla şirkəti ədalətli qiymətə almaq, orta səviyyəli şirkəti əla qiymətə almaqdan qat-qat yaxşıdır."

O hesab edir ki, investorlar yalnız ucuz görünən səhmlərə deyil, güclü maliyyə göstəricilərinə, sabit gəlirlərə, aşağı borc yükünə və peşəkar idarəetməyə malik şirkətlərə diqqət yetirməlidirlər.

1996-cı ildə keçirilən "Berkshire Hathaway" illik toplantısında Baffet bu fikrini belə izah edib:

"Həqiqətən möhtəşəm biznes yaxşı idarəetmədən asılı olmayan biznesdir. Zəif biznes isə yalnız çox güclü idarəetmə sayəsində uğur qazana və ya ümumiyyətlə fəaliyyətini davam etdirə bilər."

Onun fikrincə, uzunmüddətli investisiya strategiyası və keyfiyyətli şirkətlərə səbirli yanaşma daha uğurlu nəticələr verir.

Araşdırmadan investisiya etməyin

Baffetin tez-tez xatırlanan digər sitatı isə belədir:

"Bərbərdən saç kəsdirməyə ehtiyacınız olub-olmadığını soruşmayın."

Bu ifadə investorların qərar qəbul edərkən yalnız maraqlı tərəflərin təqdim etdiyi məlumatlara etibar etməməli olduqlarını vurğulayır.

1994-cü ildə keçirilən illik toplantıda Baffet demişdi:

"Mən başa düşmürəm ki, niyə hansısa biznesi almaq istəyən şəxs satıcının və ya onun nümayəndəsinin hazırladığı proqnozlara etibar edir."

Onun fikrincə, hər bir investor vəsait yatırmazdan əvvəl şirkəti ətraflı araşdırmalı, maliyyə göstəricilərini təhlil etməli və yalnız inandığı bizneslərə investisiya qoymalıdır.

Uorren Baffetin onilliklər ərzində formalaşdırdığı bu prinsiplər bu gün də aktuallığını qoruyur. Bazarın enişli-yoxuşlu dövrlərində emosiyalara qapılmamaq, keyfiyyətli şirkətlərə üstünlük vermək və hər investisiya qərarını ciddi araşdırmaya əsaslandırmaq uğurlu investisiya strategiyasının əsas elementləri hesab olunur.

Tənzilə Ağabalayeva