Fərid Məmmədov: "Biz Azərbaycan, Gürcüstan və Türkiyə arasında regional üçbucaq yaratmışıq"

"PASHA Financial Holding" daxili bazarda ən böyük bank və sığorta şirkətlərinə sahib olmaqla yanaşı, regional inteqrasiyaya da xüsusi önəm verir. Biz 2013-cü ildə Gürcüstan, 2014-cü ildə isə Türkiyə bazarına daxil olmaqla, regionda ticarət və bank həllərini birləşdirən regional üçbucaq modelini yaratmışıq".

​Valyuta.az xəbər verir ki, bunu "PASHA Financial Holding"in Baş icraçı direktoru və "Kapital Bank"ın Müşahidə Şurasının sədri Fərid Məmmədov Bakıda keçirilən İslam İnkişaf Bankı (İSDB) Qrupunun Özəl Sektor Forumunda (PSF 2026) çıxışı zamanı deyib.

Holdinq rəhbəri bildirib ki, layihələrin maliyyələşdirilməsi və regional əməkdaşlığın inkişafı üçün real iqtisadi səmərəlilik (feasibility) əsas şərtdir: "Yerli konteksti yaxşı anlayan özəl sektor nümayəndələri və banklar olaraq əsas rol layihələrin təkcə strateji deyil, həm də kommersiya baxımından səmərəliliyini təmin etməkdir". 

F.Məmmədov İqtisadiyyat Nazirliyinin formalaşdırdığı Dövlət-Özəl Tərəfdaşlığı (ÖİT) çərçivəsinin də məhz bu səmərəliliyi hədəflədiyini vurğulayıb.
​Çıxışda sərhədlərarası harmonizasiya məsələsinə də toxunulub.

F.Məmmədov qeyd edib ki, əgər bir yük maşını region ölkələrinin hər bir sərhədində dayanıb gözləyirsə, bu, inteqrasiya olunmuş ticarət sayıla bilməz. 

Holdinqin Türkiyədəki "Trendyol" e-ticarət platforması ilə tərəfdaşlığına diqqət çəkən icraçı direktor, ölkələr arasında ticarəti inteqrasiya etmək məqsədilə İqtisadiyyat Nazirliyi və Ələt Azad İqtisadi Zonası ilə birgə harmonizasiya edilmiş marşrutlar üzərində işlədiklərini bildirib.

​Baş icraçı direktor beynəlxalq maliyyə qurumlarının (MFI) və çoxtərəfli inkişaf banklarının ağıllı risk bölgüsündəki rolunu da önə çəkib. O qeyd edib ki, bu qurumlar bəzən real, bəzən isə sadəcə risk qavrayışı (subyektiv risk) səbəbindən yaranan maneələri aşmaqda yerli və regional oyunçulara dəstək olmalıdırlar.

Sonda özəl sektorun layihələrə ilkin mərhələdən cəlb edilməsinin vacibliyi vurğulanıb. Bildirilib ki, investorlar layihə hazır olduqdan sonra deyil, onun dizayn və strukturlaşdırılma mərhələsindən prosesə qoşulmalıdırlar.

Sərvanə Rəmixanova