"eBay" 800-ə yaxın əməkdaşını ixtisar edəcək

Texnologiya sektorunda ixtisarlar davam edir. Bu dəfə analoji addımı e-ticarət nəhəngi "eBay" atıb.

Valyuta.az xəbər verir ki, şirkət qlobal işçi qüvvəsinin təxminən 6%-ni, yəni 800-ə yaxın əməkdaşını ixtisar edəcəyini açıqlayıb. Bloomberg-ə danışan şirkət rəsmiləri bildiriblər ki, qərar təşkilati strukturu strateji prioritetlərlə uyğunlaşdırmaq və müəyyən sahələrə yenidən investisiya yatırmaq məqsədi daşıyır. Bununla yanaşı, əsas istiqamətlər üzrə işə qəbul prosesinin davam edəcəyi vurğulanıb.

İxtisar qərarı ilə eyni gündə "eBay" ikinci əl moda platforması "Depop"u "Etsy"dən 1,2 milyard dollara satın alacağını da elan edib. Bu addım şirkətin ikinci əl moda bazarında mövqeyini gücləndirmək strategiyasının tərkib hissəsi kimi qiymətləndirilir.

Qeyd edək ki, "eBay" iki il əvvəl də əməkdaşlarının təxminən 9%-ni ixtisar edib.

Sərvanə Rəmixanova