Dövlət Vergi Xidmətinin milyonluq layihəsini udan şirkət məlum oldu

Dövlət Vergi Xidmətinin elan etdiyi tenderin qalibi müəyyənləşib.

Valyuta.az xəbər verir ki, tenderin qalibi “Nooga Development AZ” MMC olub. Şirkət 2026-cı il üzrə Dövlət Vergi Xidmətinin istifadəsində olan proqram təminatlarına texniki dəstəyin göstərilməsi üzrə satınalmanı qazanıb.

Tender çərçivəsində “PKS AİS”, “DeepSage”, “TAXESBI” və “Common Reporting Standards” sistemlərinə texniki dəstəyin göstərilməsi nəzərdə tutulur. Bu xidmətlərə görə qalib şirkətə 2 milyon 118 min 397,83 manat ödəniləcək.

Qeyd edək ki, “Nooga Development AZ” MMC ötən il də Dövlət Vergi Xidmətinin iki tenderinin qalibi olub.

Məlumata görə, şirkət 2023-cü ildə yaradılıb, nizamnamə kapitalı 3 min manatdır. Şirkətin qanuni təmsilçisi Halina Ivashkadır.

Diqqət çəkən məqam isə odur ki, Vergi Xidmətinə milyonlarla manatlıq xidmətlər göstərən “Nooga Development AZ” MMC-nin nə rəsmi veb-saytı, nə də sosial şəbəkə hesabı mövcuddur.

Sərvanə Rəmixanova