"Citigroup" Trampın hesabları ilə bağlı qanunsuz işdən çıxarmada ittiham olunur

ABŞ bankı "Citigroup"un şöbələrindən birində idarəedici direktor vəzifəsində çalışmış keçmiş işçisi Bruklin federal məhkəməsində banka qarşı iddia qaldırıb. O iddia edir ki, müştərilərdən birinin hesabına dair daxili qaydaların pozulmasını gündəmə gətirdiyi üçün işdən çıxarılıb. 

Valyuta.az-ın məlumatına görə, "Reuters" öz mənbələrinə istinadən bildirir ki, hesab ABŞ prezidenti Donald Trampla əlaqəli olub.

Şikayətdə adı açıqlanmayan qadın bildirib ki, o, məlumatlara çıxışın hətta bank əməkdaşları üçün də məhdudlaşdırıldığı xüsusi hesabın açılmasına qarşı çıxıb. O, həmçinin çirkli pulların yuyulmasına qarşı qanunlara uyğunluq üçün vəsaitlərin mənşəyi barədə əlavə məlumatlar tələb edib. Onun sözlərinə görə, bu addımlardan sonra HR şöbəsi tərəfindən “saxta” daxili yoxlama başlanıb və nəticədə o, vəzifəsindən uzaqlaşdırılıb.

Keçmiş menecer hesab edir ki, o, bankın risk idarəetmə və daxili nəzarət sistemlərində ciddi çatışmazlıqlar aşkar edib və məhz buna görə cəzalandırılıb.

“Citigroup” isə ittihamları “tamamilə əsassız” adlandıraraq məhkəmədə müdafiə olunacağını bildirib. Bank qarşı iddia qaldıraraq şikayətçinin adının açıqlanmasını tələb edib və onun işdən çıxarılmadan əvvəl də işəgötürənini açıq şəkildə tənqid etdiyini iddia edib. Sənədlərdə həmçinin qeyd olunur ki, həmin əməkdaş siyasi fiqurların hesablarının açılması barədə məlumatlı məhdud şəxslərdən biri olub.

ABŞ prezident administrasiyası isə hələlik məsələ ilə bağlı şərh verməyib.

Paşa Məmmədli