Çindən 8 manata manikür və pedikür dəstləri alıb, 4 manata satmışıq

2025-ci ilin yanvar-noyabr aylarında Azərbaycana 100,78 ton manikür və pedikür dəstləri və alətləri idxal olunub.

Valyuta.az xəbər verir ki, sözügedən məhsulların idxalı üçün 586,58 min ABŞ dolları vəsait xərclənib.

Statistikaya görə, əsas idxal ölkələri Çin, Ukrayna, Koreya Respublikası və Türkiyə olub. Belə ki, Çindən Azərbaycana 90,06 ton manikür və pedikür dəstləri və alətləri idxal edilib.

Bu məhsulların dəyəri 418,81 min ABŞ dolları təşkil edib. Çindən gətirilən məhsulların 1 kiloqramının orta idxal qiyməti 4,65 dollar və ya 7,90 manat olub.

Ukraynadan isə 3,85 ton məhsul 76,79 min ABŞ dolları dəyərində idxal olunub. Bu ölkədən gətirilən məhsulların 1 kiloqramı orta hesabla 19,94 dollar  və ya 33,90 manat təşkil edib.

Koreya Respublikasından 3,28 ton məhsul 31,51 min ABŞ dolları dəyərində gətirilib. Burada 1 kiloqram üzrə orta qiymət 9,60 dollar və ya 16,33 manat olub.

Türkiyədən idxal olunan 1,67 ton məhsulun dəyəri isə 30,75 min ABŞ dolları təşkil edib. Türkiyədən gətirilən manikür və pedikür dəstlərinin 1 kiloqramının orta qiyməti 18,41 dollar  və ya 31,30 manat səviyyəsində olub.

Bununla yanaşı, İsveçrə, Polşa, Pakistan və Hindistan da sözügedən məhsulların idxalında iştirak edən ölkələr sırasında yer alıb.

Eyni dövrdə Azərbaycan xarici bazarlara 2,03 ton manikür və pedikür dəstləri və alətləri ixrac edib. İxracın ümumi dəyəri 4,94 min ABŞ dolları olub.

İxrac əsasən iki ölkəyə həyata keçirilib. Belə ki, Qırğızıstana 1,72 ton məhsul 4,1 min ABŞ dolları dəyərində ixrac olunub. Bu istiqamətdə 1 kiloqram üzrə orta ixrac qiyməti 2,38 dollar və ya 4,05 manat təşkil edib.

Gürcüstana isə 0,32 ton məhsul 0,84 min ABŞ dolları dəyərində ixrac edilib. Gürcüstana ixrac olunan məhsulların 1 kiloqramının orta qiyməti 2,62 dollar  və ya 4,46 manat olub.

Sərvanə Rəmixanova