Ceff Bezosun "Prometheus"u 12 milyard dollar investisiya cəlb edib

"Amazon"un təsisçisi Ceff Bezos və "Google"un həyat elmləri bölməsi olan "Verily"nin keçmiş həmtəsisçisi Vik Bacaj tərəfindən yaradılmış fiziki süni intellekt startapı "Prometheus" 41 milyard dollar dəyərində qiymətləndirmə ilə 12 milyard dollar investisiya cəlb etdiyini açıqlayıb.

Yeni maliyyələşdirmədə Ceff Bezosun özü ilə yanaşı, "JPMorgan Chase", "Goldman Sachs" və "BlackRock" da daxil olmaqla bir sıra iri investorlar iştirak ediblər.

Bu, "Prometheus"un ikinci investisiya raundudur. Şirkət ötən ilin sonunda fəaliyyətə başlayarkən ilkin mərhələdə 6,2 milyard dollar vəsait toplamışdı. Bu barədə "CNBC" məlumat yayıb.

"Prometheus" özünün “süni ümumi mühəndis” adlandırdığı sistem üzərində çalışır. Bu proqram təminatı reaktiv mühərriklərdən dərman birləşmələrinə qədər mürəkkəb fiziki sistemlərin layihələndirilməsi və istehsalını avtomatlaşdırmağa qadir olacaq.

Şirkətin məqsədi olduqca genişdir: mühəndislik işlərinin böyük hissəsini süni intellekt vasitəsilə əvəz etmək. Startap mühəndislərin işinin bir çox aspektini avtomatlaşdırsa da, Ceff Bezos hesab edir ki, süni intellektin yaratdığı məhsuldarlıq artımı nəticədə onun “əmək qıtlığı” adlandırdığı vəziyyətə gətirib çıxaracaq. Bu anlayış insan işçi qüvvəsinə olan tələbatın təklifi üstələdiyi dünyanı ifadə edir.

Bu mövqe texnologiya sektorundakı bir sıra tanınmış simaların fikirləri ilə ziddiyyət təşkil edir. Süni intellekt sahəsində bəzi liderlər genişmiqyaslı iş yerlərinin itiriləcəyini proqnozlaşdırsa da, Bezos fərqli düşünür.

“İqtisadiyyatda əhəmiyyətli məhsuldarlıq artımı həyat səviyyəsini yüksəldəcək”, – deyə o bildirib. “Hazırda iki nəfərin işlədiyi ailələr gələcəkdə bir nəfərin gəliri ilə dolana biləcəklər. Ola bilsin ki, artıq iş saatları ilə çalışan bəzi insanlar əlavə işləməyə ehtiyac duymayacaqlar”.

Hazırda San-Fransisko, London və Sürix ofislərində ümumilikdə 150 əməkdaşı olan şirkət indiyədək hazırladığı texnologiyaların detalları barədə məlumat vermir.

Bezos bildirib ki, cəlb olunan kapitalın böyük hissəsi şirkətin yüksək hesablama gücü tələbatının qarşılanmasına yönəldiləcək.

Bezos genişmiqyaslı əmək bazarı idarəçiliyi sahəsində də təcrübəyə malikdir. O, icraçı sədr və ən böyük fərdi səhmdar kimi fəaliyyət göstərdiyi "Amazon" şirkətində 1,5 milyondan çox əməkdaş çalışır. Şirkət son bir il ərzində baş icraçı direktor Endi Cessinin rəhbərliyi altında avtomatlaşdırma proseslərini sürətləndirərkən on minlərlə əməkdaşını ixtisar edib.

41 milyard dollarlıq qiymətləndirmə ilə "Prometheus" indiyədək maliyyələşdirilmiş ən yüksək dəyərə malik süni intellekt startaplarından biri və fiziki süni intellekt sektoruna yönəlmiş ən böyük investisiya layihələrindən sayılır.

Lakin şirkət investorların diqqətini cəlb edən yeganə oyunçu deyil. Son aylarda vençur investorları fiziki süni intellekt sahəsinə daha çox kapital yatırırlar. İnvestorlar və təsisçilər hesab edirlər ki, bu sürətlə böyüyən sektor sırf proqram təminatına əsaslanan bizneslərlə müqayisədə daha dayanıqlıdır, çünki fiziki dünya təkcə proqram kodu ilə yaradılması mümkün olmayan rəqabət üstünlükləri formalaşdırır.

Tənzilə Ağabalayeva