Banklar niyə kriptovalyuta ilə bağlı köçürmələrdə kartları bloklayır?

Şəxs özünə məxsus, qanuni kriptovalyutanı satır. Alıcı vəsaiti onun kart hesabına köçürür. Lakin bundan sonra bank kartı bloklaşdırır. Şəxs də öz-özünə düşünür ki, "Əgər əməliyyat qanunidirsə, niyə kart bağlanır?"

Banklar niyə kriptovalyuta ilə bağlı köçürmələrə riskli əməliyyat kimi yanaşır və kartları bloklayır?

Bank məsələləri üzrə mütəxəssis Emin Mahmudov Valyuta.az-a bildirib ki, bir çox insan hesab edir ki, onun günahı yoxdur. Lakin diqqətli yanaşdıqda müəyyən məsuliyyət daşıdıqları aydın olur:

"Banklar mütəmadi olaraq müştərilərinə tövsiyə edirlər ki, alış-veriş zamanı və ya kriptovalyuta platformalarında hər hansı sövdələşmə apararkən anonim hesablarla əməliyyat etməsinlər, yalnız açıq və təsdiqlənmiş hesablarla işləsinlər. Bundan əlavə, təhlükəsizliyin tam təmin olunmasını istəyən şəxslər risklərdən yayınmalı və dələduzluq yolu ilə əldə olunmuş vəsaitin onların kart hesabına köçürülməsinə yol verməməlidirlər. Bunun üçün vəsaiti göndərən şəxsdən kartın ona məxsus olduğunu təsdiqləyən sübut tələb etmək mümkündür. Həmçinin kriptovalyuta platformalarında, məsələn, “Binance” və “Bybit” platformalarında hesabın sahibinin adı ilə ödəniş edilən bank kartının sahibinin adı eyni olmalıdır. Yəni, kriptovalyutanı alan şəxs eyni zamanda istifadə olunan kartın da sahibi olmalıdır. Bu qaydalara əməl edildiyi təqdirdə dələduzluq riskini minimuma endirmək və bank tərəfindən kartın bloklaşdırılması ehtimalını azaltmaq mümkündür".

Mayya Hüseynova