Bank müştərinin şəxsi məlumatlarını icazəsiz sorğulaya bilər?

Sosial şəbəkədə bir nəfər paylaşım edib bildirir ki, bank onun sosial müdafiə və təminat məlumatlarını sorğulaması ilə bağlı mesaj göndərib. Amma şəxs qeyd edir ki, bununla bağlı o, banka hər hansı bir icazə verməyib. 

Maraqlıdır, bankların müştərinin icazəsi olmadan məlumatlarını sorğulamaq səlahiyyəti varmı?

Məsələ ilə bağlı Valyuta.az-a danışan “FINANCE MASTERS GROUP” şirkətinin təsisçisi və baş direktoru, maliyyə və bank eksperti Xəyal Məmmədli bildirib ki, şəxsi məlumatların sorğulanması vahid portal üzərindən- (MyGov) həyata keçirilir və bu sistemdə detallı seçim imkanları mövcuddur.

Onun sözlərinə görə, hər bir vətəndaş kredit təşkilatları və banklar üzrə, eləcə də ayrı-ayrı funksiyalar üzrə şəxsi məlumatlarının ötürülməsini məhdudlaşdıra və ya buna icazə verə bilər: "Əgər vətəndaş MyGov platforması üzərindən əvvəlcədən razılıq veribsə, məlumatların sorğulanması qanunvericiliyə uyğun hesab olunur".

Ekspert qeyd edib ki, vətəndaşlar portalda bu məsələyə diqqət yetirməli, məlumat ötürülməsinə icazə verilib-verilmədiyini əvvəlcədən özləri müəyyən etməlidirlər: "Portalda bütün bankların və bank olmayan kredit təşkilatlarının adları yer alır və fərdi məlumatlar, şəxsiyyət vəsiqəsi məlumatları, ailə üzvləri və gəlirlər barədə informasiyaların paylaşılması ilə bağlı ayrıca seçimlər təqdim olunur",

X.Məmmədlinin sözlərinə görə, vətəndaş istədiyi məlumatı funksiyalar üzrə və ya maliyyə qurumları üzrə məhdudlaşdıra bilər və bu seçimlərin edilməsi kifayət qədər sadədir.

O qeyd edib ki, adətən bu cür sorğular kredit rəsmiləşdirilməsi prosesi zamanı həyata keçirilir.

Sərvanə Rəmixanova