"Google"a qarşı yeni məhkəmə: Məşhur aparıcının səsi oğurlanıb?

Uzun illər NPR-in “Morning Edition” proqramının aparıcısı olmuş Devid Qrin "Google"a qarşı məhkəmə iddiası qaldırıb. 

Valyuta.az xəbər verir ki, “The Washington Post”un xəbərinə görə, Qrin "Google"un "NotebookLM" alətindəki kişi podcast səsinin öz səsindən ilham aldığını iddia edir.

Qrin deyir ki, dostları, ailə üzvləri və həmkarlarından səsin bənzərliyi barədə elektron poçtlar aldıqdan sonra bu nəticəyə gəlib. Onun iddiasına görə, qeyd olunan səs onun danışıq tempi, tonlaması və hətta “uh” kimi dolğu sözlərinin istifadəsini də əks etdirir.

Qrin NPR-dəki uzun karyerası boyunca xüsusilə səhər verilişlərindəki danışıq üslubu və özünəməxsus səs tonu ilə tanınıb. İndi isə eyni səs xarakterinin icazəsiz şəkildə süni intellekt məhsulunda istifadə olunduğunu bildirir.

"Google" tərəfindən hazırlanmış "NotebookLM" istifadəçilərə müxtəlif məzmunlar yaratmağa imkan verir. Platformanın diqqət çəkən xüsusiyyətlərindən biri də süni intellekt dəstəyi ilə podcast hazırlaya bilməsidir.

Şirkət nümayəndəsi “The Washington Post”a açıqlamasında Qrinin iddialarını rədd edib. Bildirilib ki, "NotebookLM"in “Audio Overviews” bölməsində istifadə olunan kişi səsi Qrin ilə əlaqəli deyil və "Google"a görə, bu səs şirkətin ödənişli şəkildə çalışdığı peşəkar aktyor tərəfindən təmin olunub.

Buna baxmayaraq, Qrin səsin onun danışıq üslubunu təqlid etdiyinə inanır. Hüquqi prosesin, rəqəmsal səs istehsalı və şəxsi səs hüquqları sahəsində önəmli presedent yarada biləcəyi qeyd olunur.

Həqiqi şəxslərə bənzəyən süni intellekt səsləri ilk dəfə hüquqi mübahisə yaratmır. Nümunələrdən biri "OpenAI" ilə bağlı olub. Şirkət ChatGPT üçün təqdim etdiyi səs seçimindən, məşhur aktrisa Skarlett Yohanssonun səsinin təqlid edildiyi iddiası üzündən onu ləğv etmişdi.

Qrinin "Google"a qarşı başlatdığı məhkəmə prosesi oxşar bir müzakirəni yenidən gündəmə gətirir. Süni intellekt dövründə yalnız mətnlər deyil, səslər də ciddi müəlliflik və şəxsi hüquqlar məsələlərinin mərkəzindədir. Gələcək məhkəmə qərarı texnologiya şirkətlərinin səs modelləmə proseslərini necə tənzimləyəcəyini müəyyən edə bilər.

Paşa Məmmədli