“Bank Melli İran”ın xalis mənfəətində 3,3 milyon manatlıq geriləmə - gəlirlilik zəifləyib

“Bank Melli İran” Bakı filialının 2025-ci ildə xalis mənfəəti əvvəlki illə müqayisədə 3 milyon 305 min manat və ya 42,8% azalaraq 4 milyon 411 min manat təşkil edib. 2024-cü ildə bank 7 milyon 716 min manat xalis mənfəət əldə etmişdi.

Valyuta.az xəbər verir ki, hesabat dövründə bankın faiz gəlirləri 595 min manat və ya 11,8% artaraq 5 milyon 667 min manata yüksəlib. Faiz xərcləri bu dövrdə qeydə alınmayıb, bu da xalis faiz gəlirlərinin tam qorunmasına şərait yaradıb. Nəticədə bankın xalis faiz gəliri də 5 milyon 667 min manat olub.

Vergidən əvvəlki mənfəət də azalıb - 2025-ci ildə bu göstərici 5 milyon 336 min manat təşkil edib. Bu, 2024-cü illə müqayisədə 3 milyon 948 min manat və ya 42,5% azalma deməkdir.

Ötən il bankın aktivləri 1 milyon 185 min manat və ya 1,0% artaraq 120 milyon 291 min manata çatıb. 2024-cü ilin sonunda bu göstərici 119 milyon 106 min manat idi.

Müştərilərə verilmiş kreditlər bu dövrdə 813 min manat və ya 54,4% artaraq 2 milyon 309 min manata yüksəlib. Əvəzində, nağd vəsaitlər və müxbir hesablar üzrə balans 2 milyon 737 min manat və ya 7,0% azalaraq 36 milyon 100 min manat təşkil edib.

2025-ci ildə bankın cəmi öhdəlikləri 3 milyon 227 min manat və ya 4,6% azalaraq 66 milyon 938 min manata düşüb. 2024-cü ilin sonuna bu göstərici 70 milyon 165 min manat idi.

Mayya Hüseynova