Azərbaycanlı sahibkar xanımlar “Women in Tech”də çıxış edib

Azərbaycanlı xanımlar Aysel Gülməmmədova - “Baku Design Academy”nin təsisçisi və Könül Quliyeva - “Safavy LLC”nin təsisçisi “Women in Tech” seriyasında çıxış ediblər.

Valyuta.az "The Tech"ə istinadən xəbər verir ki, hər iki təşəbbüs təhsil və texnologiyanın inteqrasiyasına əsaslanır. Bu layihələr Azərbaycanda rəqəmsal bacarıqların inkişafına və beynəlxalq standartların tətbiqinə töhfə verir.

“Baku Design Academy” İT, dizayn, marketinq və digər rəqəmsal bacarıqlar üzrə peşəkar təhsil təqdim edir. A.Gülməmmədova qeyd edib ki, karyerası təhsil, texnologiya və insanları real peşələrə hazırlayan sistemlərə olan güclü maraqla başlayıb.

Yeddi il əvvəl təsis olunan akademiyanın əsas xüsusiyyətləri arasında beynəlxalq sertifikasiya proqramlarının tətbiqi, qlobal tərəfdaşlıqların qurulması və tələbələrin əmək bazarına uyğun praktiki bacarıqlarla hazırlanması yer alır.  “Women in Tech”dəki çıxışı zamanı xanım təsisçi bildirib ki, texnologiya və liderlik sahəsində qadınlar tez-tez texniki qərarvermə və miqyasla bağlı şübhələrlə qarşılaşır, lakin real nəticələr bu kimi yanaşmalardan daha güclü təsir göstərir.

Könül Quliyevanın “Safavy LLC” təhsil marketplace platforması isə “EdTech” sahəsində fəaliyyət göstərir və istifadəçilərə müxtəlif təlim və inkişaf proqramlarına çıxış imkanı yaradır.

“Safavy” xüsusilə qadınların və gənclərin rəqəmsal bacarıqlar əldə etməsini dəstəkləyən təşəbbüslərlə seçilir. Şirkətin fəaliyyət istiqamətlərinə təlim proqramlarının təşkili, mentorluq imkanlarının yaradılması və rəqəmsal transformasiya sahəsində maarifləndirmə daxildir. K.Quliyeva qeyd edib ki, qadınların, xüsusilə anaların biznes və texnologiya sahəsində tam fəaliyyət göstərə bilməsi ilə bağlı stereotiplər mövcuddur, lakin bu yanaşmaları nəticələr və ardıcıllıqla dəyişmək mümkündür. Platforma həmçinin təlimçilər və öyrənənlər arasında əlaqə yaradan mühit kimi çıxış edir.

Mayya Hüseynova