Almaniyanın mühərrik istehsalçısı enerji gəlirlərini 1,2 milyard dollara qaldırır

Məlumat mərkəzləri və süni intellekt texnologiyalarının yaratdığı artan enerji tələbatı fonunda Almaniyanın mühərrik istehsalçısı "Deutz" enerji biznesinin satış gəlirlərini növbəti beş il ərzində üç dəfə artırmağı planlaşdırır.

Valyuta.az xəbər verir ki, şirkətin enerji bölməsinin rəhbəri Devid Evans bildirib ki, məqsəd bu istiqamətdə illik gəlirləri 1 milyard avrodan (təxminən 1,2 milyard ABŞ dolları) çox səviyyəyə çatdırmaqdır.

Şirkət elektrik enerjisi kəsintiləri zamanı enerji təchizatının davamlılığını təmin edən ehtiyat enerji sistemləri istehsal edir. Süni intellektin inkişafı və məlumat mərkəzlərinin sayının artması isə bu sistemlərə tələbatı sürətlə artırır.

Evans bildirib ki, "Deutz" artan tələbatdan yararlanmaq üçün həm üzvi inkişafı, həm də yeni satınalmaları davam etdirəcək. 

Qeyd edək ki, ABŞ-ın "Blue Star Power Systems", Almaniyanın "Frerk" və Braziliyanın "Maxi Trust" şirkətlərinin alınması "Deutz"a Şimali və Cənubi Amerika, Avropa, Afrika, Yaxın Şərq, Asiya və Avstraliyada mərkəzləşdirilməmiş enerji təchizatı bazarlarında mövqeyini gücləndirməyə imkan verib.

Rəfiqə Abdin