100 milyard dollarlıq müqavilə: "Meta" AMD-yə ortaq olur

Texnologiya dünyasının iki nəhəngi süni intellekt infrastrukturunu gücləndirmək məqsədilə milyardlarla dollarlıq razılaşmaya imza atıb. 

Valyuta.az xəbər verir ii, “Meta” məlumat mərkəzlərində istifadə olunmaq üçün AMD-nin yüksək performanslı “Instinct” qrafik prosessorlarını (GPU) tətbiq edəcəyini açıqlayıb.

“Meta” süni intellekt yarışında geri qalmamaq üçün “AMD” ilə 100 milyard dollarlıq nəhəng əməkdaşlığa başlayır. Bu razılaşma çərçivəsində şirkət yalnız çip almayacaq, eyni zamanda “AMD”nin təxminən 10 faiz səhminə sahib olmaq istiqamətində mühüm üstünlük əldə edəcək.

“Nvidia”nın bazar lideri olan çiplərinə birbaşa rəqib kimi mövqeləndirilən bu avadanlıqlar qarşıdakı illərdə “Meta”nın rəqəmsal ekosisteminin əsasını təşkil edəcək. Analitiklər əməkdaşlığın ümumi dəyərinin 100 milyard dolları keçə biləcəyini bildirirlər.

Razılaşmanın ən diqqətçəkən və indiyədək geniş ictimaiyyətə açıqlanmayan detalı mülkiyyət strukturu ilə bağlıdır. AMD “Meta”ya müəyyən edilmiş qiymətlə 160 milyon ədədə qədər səhm almaq hüququ verən hüquqi opsion təqdim edib. Bu isə gələcəkdə “Meta”nın AMD-nin təxminən 10 faizinə sahib ola biləcəyi anlamına gəlir.

Lakin bu hüquq AMD-nin öhdəlik götürdüyü avadanlıq gücünü vaxtında və tam şəkildə təhvil verməsi şərti ilə bağlıdır. İlk səhm paketi AMD-nin 1 giqavatlıq gücü təmin etməsi ilə sərbəst buraxılacaq. Ümumilikdə 6 giqavata qədər çatdırılması planlaşdırılan bu güc yüz minlərlə yüksək səviyyəli prosessorun onlarla məlumat mərkəzinə yerləşdirilməsi deməkdir.

“Meta”nın bu addımı təkcə avadanlıq alışını deyil, həm də “Nvidia”dan asılılığı azaltmaq strategiyasının bir hissəsi kimi qiymətləndirilir. Şirkət ötən həftə “Nvidia” ilə də oxşar razılaşma imzalamışdı.

AMD-nin 2026-cı ilin ikinci yarısından etibarən tədarüklərə başlaması gözlənilir. Bu prosesdən əldə olunacaq gəlirin 90–120 milyard dollar arasında dəyişəcəyi proqnozlaşdırılır. Daha əvvəl “OpenAI” ilə də bənzər sazişin imzalanması texnologiya sektorunda iri oyunçular arasında formalaşan qapalı iqtisadi dövriyyənin getdikcə genişləndiyini göstərir.

Paşa Məmmədli